Bleron Dibrani, i akuzuar për vrasjen e 19-vjeçarit Ardit Zymeri në Vushtrri, ka dalë para Gjykatës Themelore në Mitrovicë.
Në seancën fillestare të mbajtur, sot më 10.09.2025, i akuzuari e pranoi se ka poseduar armë, mirëpo nuk ndihet plotësisht fajtor për kryerjen e aktit.
“E pranoj që e kam mbytur por nuk e pranoj që e kam bërë me dashje sepse kam qenë i frikësuar e i kërcënuar prej tij. Më vjen keq për çka ka ndodhur e i shprehu ngushëllime familjes. Për armëmbajtje e pranoj fajësinë”- tha Dibrani para gjykatës.
Në anën tjetër, avokatja e tij, Fatmire Braha kërkoi nga Gjykata që të pranojë këtë pranim-fajësie.
“I propozojmë Gjykatës që të pranojë këtë pranim të fajësisë pasi që ky pranim gjen mbështjeje edhe në provat materiale që gjenden në shkresat e lëndës”- u shpreh avokatja.
Shpallja e vendimit për veprën penale “Mbajtje dhe posedim i paautorizuar i armëve”, gjyqtari Xhemajl Isufi tha se shtyhet deri në përfundimin e shqyrtimit gjyqësor në tërësi.
Ndërkaq, meqënese i pandehuri nuk e pranoi fajësinë për veprën e parë penale, pra për vrasje të rëndë, gjyqtari i dha afat mbrojtjes për kundështim të provave.
“Gjykata njofton mbrojtjen se në afat prej 30 ditësh mund të paraqesin kërkesë për hedhje të aktakuzës si dhe kundërshtim të provave për provat të cilat gjenden në lëndë”- thuhet ndër të tjera në aktvendimin e Gjykatës.
Si ndodhi vrasja në mars të këtij viti?
Në aktakuzë thuhet se i pandehuri akuzohet se me datë 23 mars 2025 rreth orës 20:30, në rrugën “Galip Badivuku” në Vushtrri, me dashje e ka privuar nga jeta viktimën Ardit Zymerit ashtu që me armën e zjarrit (pistoletë) e llojit Zoraki 917-T, e kalibrit 9 mm gaz e cila është konvertuar në armë zjarri të kalibrit 9×17 mm, e gjuan dhe e godet viktimën tre herë në trup.
Më pas, si pasojë e plagëve të shumëfishta të shkaktuara nga predhat e hedhura nga arma e zjarrit, viktima kishte pësuar dëmtime të rënda në mushkëri dhe mëlçi duke i sjellë gjakderdhje masive dhe pamjaftueshmëri të menjëhershme respiratorë.A.Z. kishte ndërruar jetë në Emergjencën e Spitalit të Vushtrrisë.
“Po ashtu nga të shtënat nga arma e zjarrit e të pandehurit në rrugë publike vihet në rrezik edhe jeta e personave tjerë”- thuhet më tej në njoftimin e Prokurorisë.
Nga Prokuroria e Mitrovicës përfundojnë se gjatë arrestimit, të pandehurit Bleron Dibranit i është gjendur dhe sekuestruar arma me të cilën është kryer vepra penale dhe e cila ka qenë në posedim në kundërshtim me Ligjin Nr.05/L -022 për Armë.
Këto u thanë edhe sot në seancë nga prokurorja e rastit, Fetije Bajrami.
Deri më tani, Bleron Dibrani ka mbajtur pesë muaj paraburgim.
Seanca fillestare ndaj të dyshuarit ishte e mbyllur për publikun, me arsyetimin se lënda ishte në fazë të hetimeve.
I dyshuari ishte arrestuar pak orë pas ngjarjes. /Kallxo.com
