Kryetari i Lëvizjes Vetëvendosje, Albin Kurti, është deklaruar shkurt për media, pasi që është pyetur nga gazetarët se kë do ta propozojnë për kryetar të Kuvendit në seancën e së dielës.
Kurti duke qeshur tha ‘’e merrni vesh të dielën’’.
Hekuran Murati, është emri i ri i VV-së që ka dështuar në përpjekjen për t’u bërë kryeparlamentar.
Emri i tij u propozua dhe u hodh në votim, por nuk arriti të marrë më shumë vota se dy kandidatët e tjerë të VV-së, shkruan gazeta online Reporteri.net.
Murati mori 57 vota pro, ndërsa 52 ishin kundër. Abstenuan 6 deputetë. Pos Nismës Socialdemokrate, në seancën e sotme abstenuan edhe deputetë të AAK-së.
Vazhdimi i kësaj seance vjen pas dështimit për të zgjedhur kryeparlamentarin të mërkurën, ku Lëvizja Vetëvendosje, si partia me më së shumti deputetë, propozoi fillimisht Albulena Haxhiun, e më pas Donika Gërvallën për kryetare të Kuvendit, por asnjëra prej tyre nuk arriti të sigurojë shumicën e nevojshme të votave për t’u zgjedhur.
Qëkur ka nisur seanca konstituive më 15 prill, deputetët kanë mbajtur edhe 54 vazhdime deri më 26 korrik, por kanë dështuar ta përmbyllin atë me zgjedhjen e kryetarit dhe nënkryetarëve të Kuvendit.
Sipas vendimit të fundit të Kushtetueses, votimi për kryeparlamentarin duhet të jetë i hapur, ndërsa i njëjti propozim për këtë post nuk mund të bëhet më shumë se tri herë./Reporteri.net/
