Një ditë pas përfundimit të zgjedhjeve parlamentare në Shqipëri, kryeministri Edi Rama ka nisur të pranojë urimet për fitoren e radhës. Ndër të parët që e ka uruar ishte ish-presidenti i Kosovës, Hashim Thaçi, përmes një telefonate që Rama e ka cilësuar si tejet prekëse dhe të veçantë.
“Telefonata e vëllaut tim Hashim ishte tejet prekëse. Komandanti ishte në formën e vet më të mirë dhe energjia e tij pozitive më preku thellë,” ka shkruar Rama, duke nënvizuar lidhjen e veçantë që ka ndërtuar ndër vite me Thaçin.
Ky gjest i Thaçit, i cili aktualisht ndodhet në Hagë, vjen si dëshmi e marrëdhënies së ngushtë që dy liderët kanë ndarë ndër vite, jo vetëm në planin politik, por edhe në atë njerëzor.
