Një zyrtar i Njësisë Speciale të Policisë së Kosovës ka përfunduar mbrëmë në pranga në Mitrovicë nën dyshimin për përfshirje në veprimtari të paligjshme.
Bëhet fjalë për pjesëtarin e Njësisë Speciale, Murat Latifi, nga Vushtrriai cili dyshohet se ka bashkëpunuar ngushtë me familjen Gerbeshi, e cila është nën hetim për aktivitete kriminale.
Latifi dyshohet se u ka dhënë ndihmë dhe informata të vazhdueshme familjes Gërbeshi, në një rast e ka transportuar me veturën e tij një nga të dyshuarit, duke i mundësuar shmangien e arrestimit, ka kryer edhe veprën penale të “Zbulimit të fshehtësisë zyrtare”.
Policia e Kosovës ka kryer edhe bastisje në shtëpinë e të dyshuarit ku ka konfiskuar telefon dhe fishekë.
Gazeta Online Veriu.info merr vesh nga burimet e saj brenda IPK se në shtëpinë e të dyshuarit është konfiskuar një telefon dhe 26 fishekë jashtë armës zyrtare.
Me urdhër të Prokurorit të Shtetit ndaj tij është iniciuar procedura penale për veprat “Keqpërdorim i pozitës apo autoritetit zyrtar”, “Ndihmë kryerësve pas kryerjes së veprës penale” dhe “Zbulim i fshehtësisë zyrtare”.
Familja Gërbeshi me të cilën polici kishte lidhje dhe u kishte dhënë informata, njihet për veprimtari të jashtëligjshme dhe probleme të vazhdueshme me ligjin.
Gazeta Online Veriu.info kishte raportuar ekskluzivisht për këtë familje.
Kujtojmë që Liridon Osmani ishte rrahur brutalisht para disa muajsh, siç thoë ai nga njerëz të familjes Gërbeshi pas problemeve me një pronë në Vushtrri.
Më pas shtëpia e tij ishte sulmuar me kallashnikov derisa familja gjendej brenda në shtëpi./Veriu.info/
