Bombarduesit iranianë ishin vetëm pak minuta larg nga goditja e bazës më të madhe ushtarake që strehonte trupat amerikane në Lindjen e Mesme, përpara se aeroplanët e Katarit t’i qëllonin në misionin e tyre të parë luftarak ajror.
Sipas një raportimi ekskluziv të CNN-it, të hënën, Garda Revolucionare e Iranit dërgoi dy bombardues taktikë Su-24 të epokës sovjetike drejt Bazës Ajrore al-Udeid, e cila strehon 10,000 anëtarë të shërbimit amerikan, dhe Ras Laffan, strukturë kyçe për përpunimin e gazit natyror dhe një themel i ekonomisë së Katarit, përcjell Insajderi.
Avionët iranianë ishin “dy minuta” larg objektivave të tyre, bëri të ditur një nga burimet për mediumin amerikan. Një burim i dytë tha për CNN-in se aeroplanët u panë dhe u fotografuan “teksa mbanin bomba dhe municione”.
Katarianët lëshuan një paralajmërim në radio, por nuk morën përgjigje nga avionët, të cilët kishin kaluar në një lartësi fluturimi prej 80 metrash për t’iu shmangur radarit zbulues, sipas burimit të dytë.
Për shkak të “kufizimeve kohore” dhe “bazuar në provat në dispozicion”, aeroplanët u “klasifikuan si armiqësorë”, shtoi burimi i dytë. Më pas, Katari dërgoi avionët e tyre luftarakë dhe një F-15 i Katarit u përball me avionët iranianë në “luftime ajrore” përpara se t’i rrëzonte, shtoi burimi i dytë.
Aeroplanët iranianë u rrëzuan në ujërat territoriale të Katarit. Zëdhënësi i Ministrisë së Jashtme të Katarit, Majed al-Ansari, tha në një konferencë për shtyp të martën se po kryhen kërkime për ekuipazhin.
Gjenerali amerikan Dan Caine, kryetar i Shtabit të Përbashkët të Ushtrisë, pranoi incidentin në një konferencë të mërkurën pa specifikuar objektivin e bombarduesve iranianë.
“Luftëtarët e Katarit për herë të parë kanë qëlluar dy bombardues iranianë në rrugën drejt vendndodhjes së tyre”, tha ai në një konferencë të shkurtër në Pentagon.
Incidenti mbi Katarin ishte i pazakontë. Zakonisht, hakmarrja e Iranit ka qenë në formë raketash ose dronësh.
