Ish Kryetari i Komunës të Mitrovicës së veriut, Goran Rakiq, është intervistuar dje nga Departamenti i Krimeve Ekonomike i Policisë së Kosovës.
Burime të Veriu.info nga Prokuroria Themelore e Mitrovicës bëjnë të ditur se Goran Rakiq është intervistuar me autorizim të prokurorit nga Departamenti i Krimeve Ekonomike i Policisë së Kosovës në cilësinë e të dyshuarit.
Siç mëson Veriu.info, Rakiq është intervistuar për shkak të dyshimit të dëmtimit të buxhetit të Komunës të Mitrovicës së veriut me punësime të paligjshme dhe dhënie të pagave dhjetëra personave pa shkuar fare në punë.
Këto punësime dyshohet se janë bërë në komunë, në sektorinë e shëndetësisë dhe në sektorin e arsimit.
Veriu.info mëson se të punësuarit që dyshohet se kanë marrë qindra mijëra euro paga pa shkuar në punë, janë shqiptarë dhe serbë.
Për të njëjtën arsye, para dy ditësh është intervistuar nga Krimet Ekonomike edhe ish nënkryetarja e Mitrovicës së veriut, Hoxhiq.
Ky burim i ka thënë gazetës Veriu.info se në ditët vijuese pritet të intervistohet si të dyshuar për këtë çështje edhe ish kryetari i Mitrovicës së veriut, Milan Radojeviq dhe ish drejtori i Drejtorisë së Arsimit, Aleksandër Markoviq.
