Në Suedi e dhe në Finlandë po shtohet përkrahja për anëtarësimin e vendeve të tyre në NATO dhe arsyeja kryesore për këtë është ndërhyrja e paprovokuar në Ukrainë e trupave të Vladimir Putinit.
Një sondazh i realizuar së fundi në Suedi e bën të qartë kthesën radikale në perceptimin publik: 41 përqind e suedezëve shprehen tani për një anëtarësim në NATO, 35 përqind janë kundër dhe 24 përqind të pavendosur. Për herë të parë shumica e popullatës në këtë vend shprehet pro një anëtarësimi në këtë aleancë.
Në Finlandë kjo kthesë është madje edhe më e qartë. Për herë të parë që prej krijimit të NATO-s shumica e finlandezëve preferojnë anëtarësimin e vendit në këtë aleancë.
“Deri para pak kohësh ishin 24 deri në 28 përqind në favor të anëtarësimit. Tani pak javë më vonë shumica prej 53 përqind shprehen pro. Një kthesë kjo vërtetë befasuese”,ka thënë Henri Vanhanen.
Si Suedia, ashtu edhe Finlanda hoqën dorë nga doktrina e neutralitetit të Luftës së Ftohtë, kur u anëtarësuan në Bashkimin Evropian. Por rolin jashtë blloqeve ushtarake ato gjatë dekadës së kaluar e vazhduan pavarësisht nga rritja e bashkëpunimit dhe ndëroperacionalitetit të këtyre dy vendeve me NATO-n.
