Dyshohet se lidhi kontratë kundërligjshëm me operatorin ekonomik “MUROYA” nga Prizreni, duke shkëputur kontratën për shërbimet e pastrimit të brendshëm dhe sanitarisë, pa paralajmërim, me operatorin ekonomik “Aroma Plus”, duke bërë që kjo e fundit ta padis.
Operatori ekonomik “Aroma Plus” e ka paditur zyrtarin e Prokurimit në Spitalin e Gjilanit, Gzim Shalën, pasi i ndërpreu kontratën për shërbimet e pastrimit të brendshëm dhe sanitarisë, raporton Gazeta Online Veriu.info.
Operatori ekonomik “Aroma Plus” kujdesej për pastërtinë e Spitalit në Gjilan qysh nga viti 2019, me disa kontrata radhazi, kurse e fundit u nënshkrua më 10.03.2023 pa afat të caktuar.
Kontrata mes “Aroma Plus” dhe Spitalit Regjional të Gjilanit kapte vlerën e 21 mijë e 950 eurove, kurse më 2 nëntor zyrtari i prokurimit në Spitalin e Gjilanit, Gzim Shala, nënshkroi me operatorin tjetër ekonomik “MBUROYA” Sh.P.K me lokacion në Prizren me procedurë të negociuar pa publikim të njoftimit, me kontratë në vlerë 29,638.85.
Ankesa nga “Aroma Plus” tashmë është dorëzuar në Organin Shqyrtues të Prokurorimit, dokument të cilin e ka siguruar Gazeta Online Veriu.info.
Kompania në fjalë ka dërguar kërkesë edhe në adresë të drejtorit ekzekutiv të Spitalit të Gjilanit, duke radhitur shkeljet që ka bërë sipas kompanisë zyrtari i prokurimit.
