Universiteti i Mitrovicës “Isa Boletini”, përkatësisht Këshilli Drejtues i këtij institucioni, ka shpallur konkurs për pozitën e rektorit, pasi ka anuluar konkursin për zgjedhjen e rektores Merita Shala kohë më parë, raporton Gazeta Online Veriu.info.
Këshilli Drejtues i UMIB pas anulimit të konkursit për rektor përmes të cilit ishte zgjedhur Merita Shala, ka caktuar fillimisht ushtruesen e detyrës, Nurten Deva, dhe më pas ka shpallur konkurs të ri.
Kësaj pozite ja ka mësyer edhe profesoresha, momentalisht ushtruese e detyrës, Nurten Deva, e cila ishte dënuar në shtator të vitit 2022 nga gjykata për mos raportim të pasurisë.
Deva ishte dënuar me gjobë në vlerë prej 800 euro.
Sipas aktakuzës, e njëjta nuk kishte deklaruar të dhënat e kërkuara, në atë mënyrë që në formularin i cili i referohet deklarimit të pasurisë, të ardhurave, dhuratave, fitimit material në Agjencinë Kundër Korrupsionit në periudhën nga 1 mars 2020 deri më 31 mars 2020, për vitin paraprak, nuk ka deklaruar të dhënat e kërkuara në formën e sipërpërmendur, në lidhje me të arriturat realisht dhe për vitin paraprak nga 1 janar 2019 deri më 31 dhjetor 2019, ku ka paraqitur shumën e të hyrave neto në vlerë prej 20 mijë e 213 euro, dhe jo të hyrat faktike në vlerë prej 25 mijë e 52 euro.
Me këtë, ajo ngarkohej se kishte kryer veprën penale “Mos raportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare” nga neni. 430 paragrafi 2 i Kodit Penal.
Kujtojmë që Universiteti i Mitrovicës në vazhdimësi është përballur me probleme të shumta në menaxhim.
