Administrata Tatimore e Kosovës (ATK) ka njoftuar se Prokuroria Themelore në Prishtinë ka ngritur aktakuzë ndaj dy pronarëve të kompanive që dyshohet se janë përfshirë në përpjekjen për të përfituar në mënyrë të kundërligjshme rreth 2.8 milionë euro nga rimbursimi i TVSH-së nëpërmjet faturave fiktive.
Kësisoj kanë pushuar hetimet ndaj 13 zyrtarëve të ATK-së.
Veriu.info mëson nga burimet e saj se aktakuza është ngritur ndaj dy biznesmenëve Feim Pulaj dhe Bedri Batatina.
Pulaj është pronar i hotelit LakeSide ku kishte investuar para disa vitesh.
Pulaj dyshohej se kishte tentuar t’i shmangej tatimit në vlerë rreth 3 milionë euro.
Ndërkaq, ATK-ja ka thënë se aktvendimi konfirmon se Administrata ka arritur të parandalojë dëmin financiar prej 2.8 milionë eurove ndaj buxhetit të Kosovës.
“Në këtë drejtim, ATK riafirmon përkushtimin e saj për të bashkëpunuar ngushtë me organet e drejtësisë dhe për të përmbushur detyrimet e saj në procedurat gjyqësore ndaj të akuzuarve në këtë rast. Njëkohësisht, ne zotohemi se do të vazhdojmë luftën kundër çdo dukurie negative, duke përfshirë përpjekjet për të përfituar padrejtësisht nga buxheti i shtetit përmes faturave fiktive dhe çdo forme të mashtrimit fiskal. Gjithashtu, do të ndërmarrim të gjitha masat e nevojshme për të parandaluar praktikat e paligjshme që dëmtojnë buxhetin e shtetit dhe besimin e qytetarëve në sistemin tatimor”, thuhej në njoftim.
Pulaj ka në pronësi edhe kompaninë private “BluePlan Kosovo AG”. Kjo kompani merret me ndërtimin e objekteve banesore, kryesisht në Komunën e Prizrenit.
Në vitin 2020, Feim Pulaj i përvetësoi 100 për qind të aksioneve të kompanisë telekomunikuese “Advan Tech”.
Kurse biznesmeni i dytë ndaj të cilit u ngrit aktakuzë është Bedri Batatina.
