Ditë më parë në medie u shkrua për dyshime mbi rezultatet pozitive të testit anti-doping të basketbollistit të Trepçës, Jordy Tshimanga, dyshime këto për të cilat Federata e Basketbollit të Kosovës dhe Agjencia e Anti-Dopingut për Kosovë (KosADA) thanë se nuk kishin asnjë konfirmim zyrtar, shkruan “Mitropol”.
Nga Agjencia Kosovare e Anti-Dopingut për AsistiOnline tri ditë më parë kanë njoftuar se për basketbollistin e Trepçës nuk ka asnjë vendim për suspendim apo shkelje të pretenduar të rregullit anti-doping, duke e pranuar se testet u janë bërë një numër të konsiderueshëm të sportistëve vendorë dhe të huaj në basketboll.
Por burime ekskluzive të “Mitropol” bëjnë të ditur se basketbollisti kanadez Jordy Tshimanga ka rezultuar përfundimisht POZITIV në testin anti-doping të kryer në laborator në Austri dhe se i njejti ka konsumuar substanca të ndaluara për konsumim për lojtarët.
Të njejtat burime bëjnë të ditur se lajmi tashmë i është përcjellur nga KosADA, Federatës së Basketbollit të Kosovës dhe vet Tshimangas, por i njejti nuk është bërë i njohur për publikun.
Burime ekskluzivive të “Mitropol” njoftojnë edhe se pritet që Trepça ta shkëpusë kontratën me Tshimangan, pas rrethanave të krijuara.
Sipas të të njejtave burime, FBK pritet që të ndërmarrë masa në raport me Tshimangan menjëherë pas publikimit të njoftimit se ai ka rezultuar pozitiv në testin Anti-doping./Mitropol/
