Kryeministri në detyrë, Albin Kurti, e ka quajtur “ëndërr të kamotshme të realizuar për Kosovën” ALPEX, bursën shqiptare të energjisë elektrike.
“Bursa Shqiptare të Energjisë Elektrike (ALPEX) është një ëndërr e kamotshme e realizuar për Kosovën. ALPEX është mekanizmi përmes të cilit tregu energjetik në të dy anët e kufirit bashkohet, e komplementariteti mes kapaciteteve tona energjetike shfrytëzohet më së miri”, ka deklaruar Kurti në ‘Facebook’, shkruan Insajderi.
Sipas Kurtit, ALPEX është një treg që operon me rregullat më rigoroze e standardet më të larta të Evropës.
“Dje dhe sot, përmes ALPEX-it, KEK ka siguruar energjinë për konsumatorët në tregun e hapur me çmime konkurruese dhe transparente”, thotë ndër të tjera ai.
Deklarimi i tij shkon përskaj asaj çfarë ka thënë ministrja në detyrë e Ekonomisë, Artane Rizvanolli, ku kritikat për blerjen e rrymës në këtë bursë i ka quajtur “klithma” e “zhurma”.
Në anën tjetër, deputetja e Lidhjes Demokratike të Kosovës, Hykmete Bajrami, ka kritikuar vendimin për importim nga ALPEX, duke thënë se energjia në treg të rregulluar kushton vetëm 29,6 euro për kilovat.
Ajo ka thënë dje se teksa çmimi në ALPEX ishte 64,55 euro për kilovat, në HUPX është 53,69 euro.
“Po Rizvanolli duhet me u përgjigjë: Pse KEK-u po blen sot energji në ALPEX me çmim 64.55 euro kur çmimi në HUPX qenka 53.69 euro edhe pse s’po ju tregon ndërmarrjeve a ka KEK-u kontratë afatgjatë për blerje të energjisë apo gjysma e ekonomisë së Kosovës është në mëshirën e tregtarëve e kumbarëve të energjisë. Psh. nesër çmimi mesatar në ALPEX do të jetë 99.87Euro MWh”, tha ndër të tjera ajo.
“Mos harroni se KEK 60 ditë është furnizues i mundësisë së fundit, pas 60 ditëve, mandej kalohet te çmimi deri 260 euro MWh”.
