Moderatori i emisionit “Debat Plus”, Ermal Panduri, i është përgjigjur kandidatit për kryetar të Mitrovicës, Faton Peci, pas deklaratave të këtij të fundit, duke i kërkuar që të mos shpikë “armiq imagjinarë” gjatë fushatës.
Panduri ka theksuar se është i vetëdijshëm që Peci është në kërkim të një “armiku” për pjesën e dytë të fushatës, por i ka bërë thirrje të mos e shpikë aty ku ai nuk ekziston. Ai ka sqaruar se exit poll-i për Mitrovicën e Jugut ka qenë i pasaktë dhe se kompania UBO Consulting, e cilësuar si një nga më të besueshmet nga vetë partnerët e koalicionit të Pecit, e ka pranuar publikisht gabimin një ditë pas zgjedhjeve.
“RTV Dukagjini dhe unë personalisht nuk kemi asnjë parapëlqim për ndonjërin prej kandidatëve në garë. Ndryshe nga disa njerëz të koalicionit tuaj që atë ditë na telefononin duke shprehur dëshirën që të fitojë kundërkandidati juaj”, ka thënë Panduri.
Moderatori i njohur ka theksuar se qëllimi i RTV Dukagjinit është të vazhdojë kërkimin e së vërtetës me qetësi dhe pa polemika të shpikura apo drama të porositura. Ai i ka kujtuar Pecit se studiot e “Debat Plus”-it janë të hapura për të gjithë, duke shtuar:
“Nëse keni prova, është Prokuroria. Nëse keni plan për Mitrovicën, është Debat Plus-i.”
Postimi i Ermal Panduri:
I dashuri Faton,
Jam i vetëdijshëm që je në kërkim të një “armiku” për pjesën e dytë të fushatës, por të lutem, mos e shpik aty ku nuk ekziston.
Po e ripërsëris, qetë dhe pa asnjë dramatizim: exit poll-i për Mitrovicën e Jugut ka qenë i pasaktë. Dhe UBO Consulting, si organizatë përgjegjëse dhe e cilësuar jo rrallëherë si më e besueshmja nga partnerët e juaj të sotëm, e ka pranuar gabimin, publikisht, vetëm një ditë pas zgjedhjeve. Kaq. Nuk është as skemë kriminale, as inxhiniering, as komplot.
RTV Dukagjini, por edhe unë personalisht, nuk kemi asnjë parapëlqim për ndonjërin prej jush që jeni në garë elektorale, siç duket ndryshe nga disa njerëz të koalicionit tuaj që ditën përkatëse na shprehnin me telefon dëshirën e tyre që të fitoj kundërkandidati juaj.
Ndaj të lutem Faton, mos tentoni të krijoni artificialisht një armik vetëm që të polarizoni për mobilizim elektoral. Ne do të vazhdojmë ta bëjmë punën tonë në kërkim të së vërtetës, me të njëjtën qetësi si gjithmonë. Pa polemikë të shpikur, pa dramë të porositur.
I keni studiot të hapura për këtë. Ju mirëpresim.
Nëse keni prova është Prokuroria. Nëse keni plan për Mitrovicën është edhe DebatPlus-i.
Me mirësjellje,
Ermal Panduri
