Gazetari Adriatik Kelmendi ka thënë se, sipas të dhënave të EXIT POLL-it të Klan Kosovës, nuk ka një ndarje të ulëseve në Kuvendin e Kosovës sikurse në vitin 2021.
Kelmendi tha se nga rezultatet e deritanishme të EXIT POLL-it, i cili përgatitet nga Pipos, tregojnë se do të jetë e vështirë që një parti e vetme të krijojë institucionet.
“Rezultati deri më tash ka një trend i cili shumë pak mund të ndryshojë. Natyrisht mund të kemi ndonjë lëvizje, mirëpo lëvizjet mund të jenë shumë të vogla. Mund të themi se nuk ka një ndarje të tillë çfarë ka pasur në zgjedhjet e kaluara dhe do të jetë e vështirë që pa bashkëpunime të krijohen institucionet”, tha Kelmendi, derisa tha se të dhënat e plota do të publikohen sot në orën 19:00.
Ai tha se me mijëra anketues janë përgjigjur në anketë.
“Me mijëra janë anketuar, por nuk dua të japë një shifër të saktë se derisa po flasim tash janë duke u anketuar qytetarët”, tha ai.
Votat e diasporës nuk janë të përfshira në këtë EXIT POLL, bëri të ditur Kelmendi.
Gazetari tha se margjina e gabimit të anketës është nga 1.5 deri në 2 për qind.
