Komuna e Podujevës që udhëheqet nga kryetari Shpejtim Bulliqi më 27 shkurt ka shpallur Ftesë për ofertim – bileta stamboll në linjën Prishtinë – Stamboll dhe anasjelltas, por duke mos cekur datën e udhëtimit dhe kthimit.
Veriu.info i ka drejtuar pyetje komunës së Podujevës më 28 shkurt, duke e pyetur se cili është qëllimi i kontraktimit të këtyre biletave, kush nga zyrtarët komunal do të udhëtoj dhe për cilat data është planifikuar udhëtimi, pasi që në dosje të tenderit nuk ka të përcaktuar data dhe dihet se çmimet për bileta aeroplani ndryshojnë mvarësisht prej datave të udhëtimeve. Mirëpo, deri në më tash nuk kemi marrë përgjigje.
Me shpejtësi të pabuesueshme dhe ta habitëshme nga ana ligjore, është shpallur fituesi i tenderit të këtyre biletave, pasi që më 28 shkurt kompania Front Travel e ka fituar këtë tender me ofertën prej 609.99 euro. Pra, vetëm një ditë pas shpaljes, është nxjerrë edhe fituesi, raporton Veriu.info.
Përveç çmimit interesant më presje dhjetore, oferta e shpallur fituese nuk po del të jetë aq e lirë, pasi që tashmë gjithë qytetarët e Kosovës po ‘bombardohen’ me ofertat e agjencioneve turistike viteve të fundit, përfshirë edhe vitin aktual, ku një pako e vizitës në Stamboll që përfshinë biletën kthyese me aeroplan, hotelin 3 ditë e 2 netë me mëngjes, sillet nga 130 deri 179 euro.
Se kush do të udhëtoj me këto bileta të paguara nga Komuna e Podujevës dhe cili është qëllimi i vizitës, mbetet për t’u parë!
