Administrata e Donald Trump e ka vendosur në pushim administrativ të gjithë stafin e Agjencisë së Shteteve të Bashkuara për Zhvillim Ndërkombëtar (USAID), duke filluar nga kjo e premte.
Kjo direktivë e re iu dërgua punonjësve të agjencisë dhe u publikua në faqen e internetit të USAID-it.
Mesazhi, i cili është i panënshkruar, thekson se do të ketë përjashtime për disa punonjës “përgjegjës për funksionet kyçe dhe lidershipin kryesor”. Në këtë moment, punonjësit janë të gjithë të pezulluar.
Ai tha se udhëheqja e re e agjencisë do të njoftojë “stafin thelbësor që pritet të vazhdojë të punojë” deri të enjten pasdite.
Një zyrtar i lartë i USAID-it, duke folur në kushte anonimiteti, tha se kjo do të thotë në thelb mbyllje të USAID-it.
Më herët të martën, Departamenti i Shtetit filloi procesin e tërheqjes të të gjithë personelit të USAID-it të vendosur jashtë vendit.
“Ne jemi ngarkuar të ndihmojmë Departamentin në tërheqjen e punonjësve të USAID-it në Shtetet e Bashkuara deri të shtunën,” shkroi Seth Green, zëvendësndihmës Sekretar i Shtetit për operacione globale.
Rreth dy të tretat e 10,000 punonjësve të USAID-it shërbejnë jashtë vendit në më shumë se 60 misione.
