Familja e banorit të Big Brother VIP Kosova, Labinot Haxhiu, ka reaguar publikisht ndaj deklaratave dhe qëndrimeve të shprehura nga banori tjetër i këtij formati, Labinot Rexha, duke i cilësuar ato si të papranueshme dhe shqetësuese.
Në reagimin e publikuar, familja e Haxhiut thekson se sulmet e vazhdueshme verbale dhe insinuatat e bëra nga Rexha ndaj Labinotit dhe familjarëve të tij përbëjnë një formë presioni dhe kërcënimi që tejkalon kufijtë e debatit apo konfliktit verbal brenda një reality show.
Sipas reagimit, veçanërisht problematike konsiderohen deklaratat që lidhen me familjen, përfshirë referenca për ndikim dhe “masa jashtë”, të shoqëruara me përmendjen e lidhjeve familjare dhe shoqërore në Mitrovicë. Familja e Haxhiut i cilëson këto si thirrje të drejtpërdrejta për dhunë dhe si tentativa për frikësim të familjarëve të tyre.
Po ashtu, në reagim dënohen ashpër edhe ofendimet e bëra ndaj qytetarëve të Mitrovicës, të cilët janë etiketuar me terma fyes si “tradhtar” dhe “hajna”. Familja e Labinot Haxhiut thekson se këto cilësime janë fyese, të padrejta dhe duhen dënuar urgjentisht, pasi prekin jo vetëm individë të caktuar, por edhe një komunitet të tërë.
Një tjetër pikë e ndjeshme e reagimit lidhet me cilësimet “tradhtarë të kombit” ndaj familjarëve që kanë emigruar në Gjermani gjatë periudhës së luftës. Sipas familjes së Haxhiut, këto deklarata janë të papranueshme dhe mohojnë sakrificat e diasporës shqiptare, e cila ka qenë dhe vazhdon të jetë një shtyllë e rëndësishme për Kosovën.
“Nuk bëhet fjalë vetëm për fyerje ndaj familjes sonë, por për një gjuhë poshtëruese ndaj qytetarëve të Mitrovicës dhe diasporës, të cilët janë shpirti i Kosovës”, thuhet në përmbyllje të reagimit.
Familja e Labinot Haxhiut kërkon që këto deklarata të trajtohen me seriozitet dhe të mos normalizohet gjuha e urrejtjes, kërcënimit apo përçarjes, pavarësisht kontekstit televiziv në të cilin janë shprehur.
