Vjosa Osmani, presidente e vendit, ka shprehur ambicien e saj për një mandat të dytë si e para e shtetit.
Por, nuk dihet nëse ajo do të kandidohet nga Lëvizja Vetëvendosje, e cila nuk e ka përmendur fare këtë çështje.
Lidhur me çështjen e presidentit, që duhet të zgjedhet në fillim të muajit mars, politologu Dritëro Arifi ka thënë se nëse ajo e meriton ose jo edhe një mandat varet nga opozita se si do ta trajtojë çështjen, pasi raportet e saj me të nuk janë të mira.
“Është vështirë të thuhet a e meriton edhe një mandat, varet nga opozita se si e sheh sepse gjithçka varet nga ta, a do të qëndrojë në sallë, se jo a do ta votojë, varet se çfarë raportesh do të ndërtojë presidentja me partitë por që aktualisht janë jashtëzakonisht jo të mira, varet nga VV se çka dëshiron nga presidenca, a dëshiron edhe këtë pozitë që t’i ketë të tri pozitat kryesore në dispozicion të tyre, a dëshiron marrëveshje politike apo cilin skenar, ose skenarin e presionit, ku partitë, nga frika e shkuarjes sërish në zgjedhje mund ta votojnë cilindo kandidat për president që do ta propozojë VV. Në këtë rast, pozita e VV-së është shumë komode, i gjithë presioni bie mbi partitë opozitare, edhe ato çfarë dëshirojnë, a janë të gatshme për zgjedhje, a duan kompromis por askush s’po i pyet, apo do të qëndrojnë në sallë për ta mbuluar edhe këtë pikë për të qenë komod edhe ato për katër vitet e ardhshme. Pra, ka variacione të vogla për opozitën, më shumë komoditet skenarë pozitive per VV-në”, ka vlerësuar ai.
Sipas Arifit, VV është në pozitë të favorshme për çështjen e presidentit sepse mund t’i bëjë presion opozitës që ta votojë cilindo kandidat, në mënyrë që të mos shkohet sërish në zgjedhje.
“S’ka pasur iniciativa serioze për këtë çështje dhe duke e parë z.Kurti dhe partitë opozitare, vështirë se mund të ketë ndonjë kompromis të përshtatshëm për të dyja palët, të përshtatshëm për VV-në po por jo për opozitën për të cilën do të jetë shumë e vështirë sepse VV është në pozitë të favorshme dhe ajo do të luajë me këta skenarë, do të krijojë presion që ata të votojnë këdo që do të jetë kandidat për president për të mos shkuar në zgjedhje, edhe nëse shkohet në zgjedhje është sërish në favor të saj”, ka theksuar politologu.
Ai thotë se është në dorën e VV-së “fati” i Vjosa Osmanit, se a do që ta ketë sërish Osmanin presidente me batica e zbatica apo dëshiron ta ketë edhe atë post për vete.
“Sa i përket Vjosa Osmanit është plotësisht në dorën e VV-së se a dëshiron që të vazhdojë me të, me batica dhe zbatica, apo dëshiron një kandidat që është 100 për qind e fokusuar në politikat e VV-së. Kjo varet edhe nga marrëveshja që mund ta bëjnë në ditët në vazhdim VV me presidente aktuale, e cila dëshiron edhe një mandat”, ka deklaruar Dritëro Arifi.
