Pezullimi nga puna duket se nuk u mjaftoi, andaj Inspektorati i Punës ka marrë veprime tjera ndaj kryeinspektorit të Punës për Rajonin e Mitrovicës, Nexhat Fazliu.
Pas pezullimit nga puna, kryeinspektori për rajonin e Mitrovicës Nexhat Fazliu ka reaguar sot përnes një statusi publik ku ka thënë se nga njerëzit e emëruar nga Albin Kurti po iu pengojnë edhe fotografitë e dëshmorëve në zyra, raporton Gazeta Online Veriu.info.
Ai thotë se kryeinspektori ilegal Hekuran Nikçi ka urdhëruar largimin e fotografive të familjarëve të tij dëshmorë, dhe fotografinë e Adem Jasharit.
Fazliu si dëshmi për këtë ka publikuar komunikimin me persona nga inspektorati të cilët e kanë njoftuar për largimin e gjërave personale nga zyra.
Fazliu u pezullua me vendim të kryeinspektorit të Punës Hekuran Nikçi para më shumë se 10 ditësh, pasi inspektori Fazliu kishte bashkëpunuar me Policinë e Kosovës në hetimin e kompanisë së Milan Radojçiq lidhur me sulmin në Banjskë.
Nikçi kishte kërkuar llogari nga Fazliu për dhënien qasje në dokumentacion, deri në finalizim me pezullim nga vendi i punës.
Më poshtë ju sjellim postimin e Inspektorit Fazliu:
Njerëzit e emëruar nga Albin Kurti po ju pengojnë edhe fotografitë e dëshmorëve, duke përfshirë edhe fotografinë e Komandantit Legjendar Adem Jashari.
I emëruari në mënyrë të kundërligjshme nga Albin Kurti, kryeinspektori ilegal Hekuran Nikçi, urdhëron të largohen nga zyra ime edhe fotografitë e familjes sime dëshmorë, të babait dhe familjarëve të tjerë dëshmorë, si dhe fotografia e Komandantit Legjendar Adem Jashari.
Zot jepna durim, sepse keto janë veshtira të përballohen. Por besoj se shumë shpejt do të reagojë Prokuroria Speciale dhe do t’i largojë nga zyrat e Inspektoratit Qendror të Punës këta antikombëtarë, të cilët i pengojnë edhe fotografitë e dëshmorëve.
Më poshtë në këtë postim mund t’i shihni faktet se si i kanë larguar nga zyra fotografitë e dëshmorëve.
