Më 9 qershor 2025 është përuruar një mini-stacion policor në fshatin Izvor të Zveçan, ku të pranishëm në ceremoni ishin kryeministri në detyrë, Albin Kurti, ministri në detyrë i MPB-së, Xhelal Sveçla, drejtori i policisë, Gazmend Hoxha dhe biznesmeni Kujtim Seferi dhe vëllain, Avdullahun.
“Objekti i ri është një investim prej 750 mijë euro dhe ka një sipërfaqe të përgjithshme prej afër katër mijë metrash katrorë. Aty do të shërbejë Njësia e Ndërhyrjes së Shpejtë të Kufirit, e cila nga ky stacion, që u ofron kushte të dinjitetshme, do të përkujdeset për sigurinë kufitare dhe parandalimin e aktiviteteve ilegale që cenojnë sigurinë e vendit”, kishte shkruar Albin Kurti krahas një videoje të publikuar me momente nga ceremonia e përurimit.
Veriu.info kishte marrë informacione për dyshime se në kontratën për ndërtimin e këtij mini-stacioni ka dallavere në vlerë dhe procedurë të tij. Në bazë të Ligjit për Qasje në Dokumente Publike më 21 qershor 2025 Veriu.info në Ministrinë e Punëve të Brendshme ka bërë kërkesë për qasje në kontratën për ndërtimin e këtij stacioni policor, por që ministria e drejtuar nga Xhelal Sveçla nuk kishte kthyer përgjigje.
Më pas Veriu.info ka bërë ankesë në Agjencinë për Informim dhe Privatësi ndaj MPB-së, e cila duke shkelur afatet ligjore kishte prolonguar procesin. Pas kërkesave të vazhdueshme nga Veriu.info për AIP, kjo agjenci kishte kërkuar nga MPB të na jep qasje në kontratë, por që prapë nuk na është ofruar kontrata.
Të vetmen përgjigje që e ka dhënë MPB-ja për këtë çështje është se ky proces konsiderohet i klasifikuar (v.j. sekret).
“Procesi është i klasifikuar me Vendimin e MPB-së, nr.C003/2024 të datës 22.05.2024”, thuhet në përgjigjen e Behar Haziraj – zyrtar për media i MPB-së.
Burime të Veriu.info bëjnë të ditur se tenderin për ndërtimin e këtij stacioni policor e ka fituar kompania “FINN OIL PETROL” Sh.P.K., aksionarë të së cilës janë Kujtim Seferi dhe Burim Dibrani me nga 50%.
Veriu.info ka tentuar të kontaktoj me Burim Dibranin, por ai nuk është përgjigjur në pyetjet e redaksisë se me çfarë procedure është nënshkruar kontrata, a ka pasur referenca të punëve paraprake në ndërtim, a është e vërtetë që vlera reale e projekti është rreth 300 mijë euro, a ka pasur takime private me Xhelal Sveçlën në pompën e tij në Zhabar të Mitrovicës para nënshkrimit të kontratës, a është takuar me drejtorin e AKI-së në një restorant në Mitrovicë pas nisjes së punimeve.
Gazetari i Veriu.info ka tentuar të kontaktoj edhe me aksionarin tjetër të “FINN OIL PETROL” Sh.P.K., Kujtim Seferi, por që sapo ka kuptuar se me kë po flet, e ka ndërprerë telefonatën dhe nuk është përgjigjur në pyetjet e dërguar me shkrim.
Veriu.info ka siguruar një video të realizuar para rreth një viti, ku shihen duke biseduar Burim Dibrani dhe Glauk Konjufca në Finn Oil Petrol në Zhabar të Mitrovicës, në të cilën biznesmeni i thotë asokohe kryeparlamentarit se është ne negociata e bisedime për me kry punë në pjesën veriore.
“Po presim edhe në pjesën veriore, i kemi do negociata do bisedime, por presim edhe atje me fillu diçka. Kemi edhe plane tjera, po këto pa sigurinë e shtetit s’kishim mujt me i bo ato”, i thotë Dibrani – Konjufcës.
“Kur ju shohim edhe juve që po bashkëpunoni me institucionet e shtetit dhe suksesi juaj është edhe për shkak të këtij bashkëpunimi”, thotë Konjufca ndër të tjera në bashkëbisedim me Dibranin.
Këto negociata e bisedime duket se kanë qenë shumë frytdhënëse për Burim Dibranin dhe ortakun e tij, Kujtim Seferi, që kanë kulmuar me një tender njëbjurimor (pa konkurrencë) në vlerë prej 750 mijë euro për ndërtimin e një stacioni policor në një fshat periferik të Zveçanit, vlera reale e të cilit sipas sinjalizuesve të Veriu.info është rreth 300 mijë euro.
Cila është afërsia e FINN OIL PETROL me Vetëvendosjen?
Përveç videos ku shihet në bashkëbisedim me Glauk Konjucën e realizuar në pompën e Finn, pronarët e kësaj kompanie njihen edhe për diçka tjetër, ndejën deri në 02:30 të mëngjesit me Albin Kurtin dhe Faton Pecin në natën e zgjedhjeve të 12 tetorit, natë kur është raportuar për dyshime në ndërhyrjen e vullnetit të votuesve në Mitrovicë.
Pra, siç shihet në foto, Kujtim Seferi, me vëllain Avdullahin, ishin në një takim privat në Zhabar të Mitrovicës me Albin Kurtin, Faton Pecin e Armend Mujën natën e zgjedhjeve, vetëm 5 orë para hapjes së vendvotimeve.
Historia e Avdullah Seferit me shtetin?
Personi që po e shihni në foton e mëposhtme duke ia mbajtur gërsherët Kurtit e Sveçlës është Avdullah Seferi, vëllai i Kujtim Seferit, për të cilin Veriu.info mëson se është përjashtuar nga puna në ndërmarrjen “Trepça” për shkak të shkeljes së detyrave të punes.
Përveç në ceremoninë e përurimit të stacionit policor, ai merr pjesë edhe në tavolinë me Kurtin në natën e zgjedhjeve.
