Trajneri i Barcelonës, Hansi Flick, ka thënë se pavarësisht problemeve me lëndime, skuadra e tij do ta vazhdojë garën për titull në LaLiga.
Barcelona do të luajë të shtunën në udhëtim me Athletic Bilbao, duke synuar ta ruajë epërsinë prej katër pikësh ndaj Real Madrid në krye të tabelës.
Skuadra katalanase ka pësuar dy lëndime gjatë ndeshjes me Atletico Madrid në gjysmëfinalen e Copa del Rey. Mbrojtësit Jules Kounde dhe Alejandro Balde janë lënduar në atë ndeshje. Megjithatë, edhe pse ka fituar me rezultat 3-0, Barcelona nuk ka arritur ta përmbysë humbjen e madhe nga ndeshja e parë dhe është eliminuar nga gara.
Po ashtu, mesfushorët Frenkie de Jong dhe Gavi vazhdojnë të jenë jashtë për shkak të lëndimeve. Lajm i mirë për Barcelonën është rikthimi i sulmuesit Robert Lewandowski, i cili është i gatshëm për ndeshjen ndaj Athletic.
“Gjërat e tilla ndodhin. Nuk jam i lumtur, por është përgjegjësia ime”, ka thënë Flick. Ai ka shtuar se do të bisedojë me stafin mjekësor dhe teknik për të parë se çfarë mund të përmirësohet në menaxhimin e skuadrës.
Trajneri gjerman ka theksuar se, pavarësisht lëndimeve, skuadra duhet të mbetet optimiste dhe t’u japë mundësi lojtarëve të tjerë të tregojnë vlerat e tyre.
Barcelona aktualisht kryeson tabelën e LaLiga me katër pikë më shumë se Real Madrid, ndërsa Athletic Bilbao renditet në vendin e nëntë. Flick ka thënë se sezoni është ende i gjatë dhe se kanë mbetur shumë ndeshje deri në fund të majit.
Edhe pse Barcelona nuk ka arritur të kualifikohet në finalen e Copa del Rey, Flick është shprehur i kënaqur me nivelin e lojës së skuadrës.
“Jemi në një nivel shumë të lartë dhe kjo duhet të na japë besim për vazhdimin e sezonit”, ka thënë ai.
