Franca do ta ashpërsojë ndalimin e përdorimit të telefonave celularë në shkollat e mesme, duke i detyruar nxënësit e moshës 11 deri në 15 vjeç t’i mbyllin pajisjet e tyre në një dollap apo qese të veçantë në fillim të ditës dhe t’i marrin sërish vetëm kur të largohen nga shkolla, shkruan The Guardian.
Ministrja e Arsimit i tha senatit se dëshironte që fëmijët të ndaheshin plotësisht nga telefonat e tyre gjatë gjithë ditës së mësimit në të gjitha shkollat e mesme franceze duke filluar nga shtatori.
Élisabeth Borne tha: “Në një kohë kur përdorimi i ekraneve po vihet në pikëpyetje për shkak të shumë efekteve të dëmshme, kjo masë është thelbësore për mirëqenien dhe suksesin e fëmijëve tanë në shkollë”.
Në vitin 2018, Franca ndaloi përdorimin e telefonave nga fëmijët në të gjitha shkollat e mesme – të njohura si ‘collèges’. Telefonat duhet të mbeten të fikur në çanta shkolle dhe nuk mund të përdoren askund në ambientet e shkollës, përfshirë gjatë pushimeve.
Shkollat kanë raportuar një efekt pozitiv, me më shumë ndërveprim shoqëror, më shumë aktivitet fizik, më pak ngacmime dhe përqendrim më të mirë. Por disa shkolla raportuan se disa fëmijë do të fshiheshin në tualete për të parë video në telefon gjatë pushimit.
Tani qeveria thotë se është e nevojshme të shkohet edhe më tej, duke i ndarë fëmijët plotësisht nga pajisjet e tyre gjatë gjithë ditës shkollore.
Kjo “pauzë digjitale” e detyruar – siç e quan qeveria franceze – është testuar në një skemë pilot në rreth 100 shkolla të mesme gjatë gjashtë muajve të fundit, ku fëmijët i dorëzojnë telefonat që në hyrje – duke i vendosur në një dollap, kuti ose në një qese të veçantë me kyç që mund të hapet vetëm nga një sistem elektronik në portën e shkollës kur largohen për në shtëpi.
