Forca e Sigurisë së Kosovës po merr pjesë me një kontingjent nga Regjimenti i Tretë i Këmbësorisë, duke përfshirë një togë mortajash, në ushtrimin ndërkombëtar “Dynamic Front 26”, i organizuar nga Ushtria Amerikane për Evropë dhe Afrikë (USAREUR-AF).
Ky ushtrim shumëkombësh, sipas FSK-së, teston ndërveprueshmërinë e ushtrive të NATO-s dhe partnerëve në fushën e artilerisë dhe zjarrit indirekt. Për këtë vit, ushtrimi zhvillohet paralelisht në pesë shtete: Gjermani, Rumani, Poloni, Spanjë dhe Turqi.
FSK ka zbarkuar në Grafenwöhr Training Area në Gjermani, me të gjitha kapacitetet logjistike, duke përfshirë automjetet, armatimin dhe municionin.
Kontingjenti i FSK-së ka vepruar bashkëngjitur me Regjimentin 4-319 të Artilerisë Fushore të Ushtrisë Amerikane, ndërsa togu i mortajave, përbërë nga Vija e Zjarrit, Qendra e Drejtimit të Zjarrit dhe Vëzhguesit e Përparëm, ka realizuar qitje mbi objektiva në koordinim me Ushtrinë Amerikane dhe trupat italiane.
Gjatë ushtrimit, FSK ka demonstruar përvojën e saj në qitje me mortaja gjatë ditës dhe natës, si dhe ka shkëmbyer mësime dhe praktika më të mira me forcat partnere.
