Arben Gashi nga Lidhja Demokratike e Kosovës, duket se nuk ka arritur të sigurojë votat për të marrë ulëse në Kuvendin e Kosovës.
Gashi, përmes një postimi, ka hedhur akuza duke thënë se procesi i numërimit në Qendrat e Numërimit Komunal ka dështuar dhe se duhet të bëhet rinumërimi.
“Siç po duket, procesi i numërimit në Qendrat e Numërimit Komunal ka dështuar. Ky dështim ka dëmtuar gjithashtu rëndë besimin në vërtetësinë e rezultatit zgjedhor. Për hir të ruajtjes së besimit në procesin demokratik, KQZ duhet të vendosë për rinumërimin e të gjitha votave në Qendrën e Numërimit dhe të Rezultateve në Prishtinë.” – ka thënë Gashi.
Ai tutje është shprehur se në këto zgjedhje ka pasur manipulim masiv me votat e diasporës, dhe sipas tij, manipulimi më i madh ka ndodhur brenda partive politike.
“Një fenomen tjetër i vërejtur në këto zgjedhje është manipulimi masiv me votën e diasporës. Këto vota, siç po shihet, janë manipuluar sidomos brenda partive politike. Demokracia, ndër të tjera, është edhe besim në institucionet e zgjedhura. Vendi ka nevojë për institucione përfaqësuese dhe të besueshme.” – ka përfunduar Gashi.
