Pas Albulena Haxhiut dhe Donika Gërvallës dje dështoi të marrë votat e nevojshme për kryeparlamentar edhe Ministri në detyrë i Financave, Hekuran Murati.
Murati arriti të marrë veç 57 vota, 52 ishin kundër dhe gjashtë abstenuan vota këto të pamjaftueshme për t’u zgjedhur kryeparlamentar.
Megjithëse ish-partitë opozitare kanë deklaruar se mund t’i votojnë disa emra nga Lëvizja Vetëvendosje, të njëjtit nuk po kandidohen nga kjo parti.
Se a po bëhet kjo me qëllim nga LVV-ja dhe pse po propozohen emra të tjerë ka folur për “Gazeta Blic”zyrtarja e LDK-së dhe ish-deputetja e kësaj partie, Besa Gaxherri.
Gaxherri tha se Lëvizja Vetëvendosje po e vendos në sprovë kushtetutshmërinë dhe bazamentin e shtetit.
Sipas saj, Kurti e ka kthyer në lojë konstituimin e Kuvendit për llogari të tij elektorale për të vazhduar kjo gjendje në mënyrë që të vazhdojnë aferat e tyre korruptive.
“VV po e vë në sprovë, kushtetutshmërinë dhe bazamentin e këti shteti që është bërë e ndertuar me shumë mund e sakrificë”
“Kurti e ka kthyer në lojë konstituimin e Kuvendit për llogarit e veta elektorale dhe për të vazhduar kjo gjendje që të vazhdojnë aferat e tyre korruptive, sidomos me mafien energjetike” tha Gaxherri në përgjigjen e dhënë për “Gazeta Blic”.
Më 8 gusht, Gjykata Kushtetuese mori vendim që brenda 30-ditësh të zgjedhet kryeparlamentari i ri përmes votimit të hapur, duke e hedhur në votim të njëjtin kandidat jo më shumë se tri herë.
