Kryetari i Prishtinës, Përparim Rama, ka ngrerë alarm të madh se Komuna e Prishtinës ka mbetur pa buxhet dhe se gjendja ka kaluar në nivele “jo njerëzore” dhe “thellësisht e rrezikshme”.
Bllokadën e buxhetit ai e quajti “të qëllimshme” dhe jo thjesht vonesë procedurale.
Postimi i plotë:
KJO NUK ËSHTË MË ÇËSHTJE POLITIKE! KJO ËSHTË JO-NJERËZORE. ËSHTË E MJERË. ËSHTË THELLËSISHT E RREZIKSHME!
Prej më shumë se gjysmë viti, Prishtina është pa buxhet. Dhe kjo nuk është më një vonesë procedurale – është një bllokadë e qëllimshme, që po dëmton drejtpërdrejt jetën e përditshme të qytetarëve.
Çerdhet dhe kopshtet nuk kanë më fonde për të siguruar ushqim për fëmijët. Programet sociale janë bllokuar. Familjet në nevojë, personat me aftësi të kufizuara, të moshuarit, artistët dhe sportistët kanë mbetur pa asnjë mbështetje institucionale.
Rreziku është alarmant dhe prek të gjitha shërbimet jetike në Kryeqytet: qendrat e kujdesit shëndetësor dhe transporti publik rrezikojnë shërbimin dhe arsimi parashkollor është në vështërsi. Të gjitha shërbimet jetike janë prekur nga bllokada e qeverisë.
Kryeqytetit i bllokohet buxheti i nevojshëm për të paguar faturat e saj elementare. Një ndalese e jashtëligjshme e motivuar politikisht, që qëllimshëm po paralizon funksionimin institucional.
Përtej buxhetit qendror, janë bllokuar edhe të hyrat vetanake të Komunës së Prishtinës – të mbledhura nga vetë kontributi i qytetarëve. Ky është një akt i paprecedent dhe i papranueshëm që i shndërron qytetarët në pengje të një kalkulimi politik.
Një bllokadë e tillë administrative, e motivuar nga interesa elektorale për zgjedhjet lokale të 12 tetorit, ka tejkaluar çdo kufi të arsyes, etikës dhe përgjegjësisë njerëzore e institucionale. Kryeqyteti po ndëshkohet sepse nuk qeveriset nga strukturat qendrore të pushtetit aktual.
KJO NUK ËSHTË UDHËHEQJE – ËSHTË HAKMARRJE POLITIKE DHE MBI TË GJITHA, ËSHTË NJË SHKELJE FLAGRANTE E TË DREJTAVE TË QYTETARËVE PËR SHËRBIME, SIGURI DHE MIRËQENIE.
Ne jemi dëshmitarë të një dështimi institucional dhe një kërcënimi serioz për stabilitetin dhe funksionimin demokratik të Kryeqytetit. Kjo qasje nuk ndëshkon një kryetar komune. Ajo ndëshkon një qytet të tërë – fëmijët, të moshuarit, familjet në nevojë, dhe çdo qytetar që pret shërbime bazë.
Nuk do të lejojmë që qytetarët të penalizohen. Në një situatë ku llogaria politike mbizotëron mbi interesin publik, ne mbetemi të vendosur të mbrojmë qytetarët e Kryeqytetit. Për të tretën herë me radhë, i jemi drejtuar zyrtarisht Ministrisë së Financave, Punës dhe Transfereve, me kërkesën që të veprojë në përputhje me Ligjin për ndarjet buxhetore për vitin 2025 dhe të ofrojë një zgjidhje urgjente dhe ligjore, jo të prodhojë pengesa të reja.
Ne do të përdorim çdo mjet ligjor dhe institucional për të mbrojtur qytetarët tanë nga kjo padrejtësi flagrante dhe luftë e ulët politike.
Ky nuk është vetëm detyrimi ynë institucional. Është detyrimi ynë moral.
