Ish-deputeti i Kuvendit të Kosovës, Isak Shabani ka thënë se ushtarët e Kosovës po shërbejnë në mes të “mykut dhe papastërtisë”.
Ai ka publikuar pamjet e kazermës në Pomozetin, e cila është në gjendje katastrofike.
Shabani kritikoi Qeverinë e Kosovës për kushtet e mjerueshme në kazermë.
“Është e papranueshme që në vitin 2025, pjesëtarët e ushtrisë sonë të qëndrojnë në kushte që përbëjnë rrezik për shëndetin. Muret e përbaltura, pullazët që rrezikojnë të bien, dhe mungesa e pastërtisë bazike nuk janë vetëm turp institucional, por edhe një fyerje për ata që veshin uniformën me krenari”, tha Shabani.
Shkrimi i plotë i Shabanit:
FSK në kushte mjerimi-Qeveria flet për dronë dhe helikopterë me pompozitet, ndërsa ushtarët shërbejnë në mes mykut dhe papastërtisë!
Gjendje alarmante në Kazermën e FSK-së në Pomozetin – Ku janë investimet e premtuara nga Qeveria?
Prej vitesh dëgjojmë deklarata të bujshme nga zyrtarët qeveritarë për rritjen e investimeve në Forcën e Sigurisë së Kosovës. Premtime për modernizim, kushte më të mira për ushtarët, dhe rritje të kapaciteteve infrastrukturore. Por realiteti në terren flet ndryshe – flet me myk, papastërti, dhe rrezik për shëndetin dhe jetën e pjesëtarëve të FSK-së.
Fotografitë e mëposhtme të shkrepura në kazermën e Pomozetinit flasin vetë. Tualete të papastra dhe të pa mirëmbajtura, mure me lagështi dhe myk të theksuar, pajisje të vjetruara, dhe ambiente të papërshtatshme për shërbim. Gjendja është poshtë çdo standardi minimal për një institucion që ka për detyrë mbrojtjen e vendit.
Është e papranueshme që në vitin 2025, pjesëtarët e ushtrisë sonë të qëndrojnë në kushte që përbëjnë rrezik për shëndetin. Muret e përbaltura, pullazët që rrezikojnë të bien, dhe mungesa e pastërtisë bazike nuk janë vetëm turp institucional, por edhe një fyerje për ata që veshin uniformën me krenari.
Qeveria duhet të japë përgjigje:
Ku janë fondet e alokuara për ushtrinë? Kush është përgjegjës për këtë gjendje? Dhe kur do të ndërmerren masa konkrete?
Nëse vërtet synojmë një ushtri profesionale dhe moderne, atëherë fillimisht duhet të fillojmë nga baza – nga kushtet e jetesës dhe të punës së ushtarëve tanë.
Patriotizmi nuk ndërtohet me fjalë, por me vepra
