Një incident me armë zjarri është raportuar mbrëmjen e së shtunës në Prishtinë, ku pas intervenimit të Policisë janë sekuestruar disa armë dhe fishekë, ndërsa tre persona janë shoqëruar në stacionin policor, raporton Gazeta Sinjali.
Burimet e Sinjalit bëjnë me dije se më 26 korrik 2025, rreth orës 23:00, në rrugën “Kaje Selmani” është raportuar për të shtëna me armë zjarri. Njësitë policore së bashku me hetuesit kanë dalë menjëherë në vendin e ngjarjes, ku janë gjetur dhe sekuestruar: • Tri pistoleta, • 50 fishekë, • 15 gëzhoja të kalibrave të ndryshëm.
Sipas hetimeve fillestare, tek B.X. rreth 32-vjeçar është gjetur një pistoletë me gaz, tek A.Q. rreth 26-vjeçar një pistoletë e tipit Smith & Wesson, ndërsa tek A.D. rreth 27-vjeçar një pistoletë me gaz model Zoraki.
Të tre të dyshuarit janë shoqëruar në stacionin policor, ku janë intervistuar në prani të avokatëve mbrojtës, ndërsa me urdhër të prokurorit kujdestar, rasti është iniciuar për veprat penale: – “Mbajtje në pronësi, kontroll ose posedim të paautorizuar të armëve”, dhe – “Përdorim i armës apo mjetit të rrezikshëm”.
Të dyshuarit janë liruar në procedurë të rregullt, ndërsa hetimet lidhur me rastin janë në vazhdim.
