Gjykata Themelore në Mitrovicë – Dega në Vushtrri, gjyqtari i procedurës paraprake ka aprovuar kërkesën e Prokurorisë Themelore në Mitrovicë për caktimin e masës së paraburgimit ndaj të pandehurit Agim Gerbeshi, raporton Veriu.info.
Në njoftimin e Gjykatës thuhet se daj të pandehurit Agim Gerbeshi, është caktuar masa e paraburgimit në kohëzgjatje prej një (1) muaji, për shkak të dyshimit të bazuar se ka kryer veprën penale Detyrimi, nga neni 328 paragrafi 2 lidhur me paragrafi 1, si dhe nenet 31 dhe 77 të Kodit Penal të Republikës së Kosovës (KPRK).
“Paraburgimi i llogaritet nga data 03.02.2026 dhe do të zgjasë deri më 05.03.2026. Me datë 22.09.2025, Prokuroria Themelore ka paraqitur kërkesë për caktimin e masës së paraburgimit ndaj të pandehurit E.G., për shkak të dyshimit të bazuar për kryerjen e veprës penale Detyrimi. Ndërkohë, i pandehuri A.G., i cili nga ajo periudhë nuk ishte i qasshëm për organet e ndjekjes, ka qenë në kërkim sipas urdhër-arrestit të lëshuar më 08.10.2025. Më 03.02.2026, i pandehuri A.G. është paraqitur vullnetarisht para organeve të ndjekjes, ndërsa më 04.02.2026 Prokuroria Themelore në Mitrovicë ka paraqitur kërkesë në gjykatë për caktimin e masës së paraburgimit ndaj tij.Pas kësaj, gjyqtari i procedurës paraprake ka mbajtur seancë dëgjimore për shqyrtimin e kërkesës së prokurorisë”, thuhet në njoftimin e Gjykatës Themelore të Mitrovicës.
Bëhet e ditur se kundër këtij aktvendimi është e lejuar e drejta në ankesë, në afat prej 48 orësh nga momenti i pranimi të aktvendimit.
(Pamje e sotme nga dërgimi i Agim Gerbeshit në Gjykatën e Vushtrrisë. Credits: Kallxo)
