Një incident serioz ka ndodhur në orët e para të mëngjesit të së shtunës në veri të vendit, ku një person dyshohet se ka sulmuar zyrtarët policorë duke mos iu bindur urdhrave për ndalim.
Ngjarja ka ndodhur rreth orës 02:00, në rrugën “Shala e Bajgores” në Mitrovicë, kur njësitë policore po përcillnin një veturë Mercedes me targa 02…. RKS, për të cilën dyshohej se transportonte mall të kontrabanduar (duhan).
Kur automjeti është përcjellë deri te Terminali Doganor, shoferi nuk ka përfillur urdhrat e policisë për t’u ndalur dhe ka vazhduar lëvizjen në drejtim të Prishtinës. Gjatë tentativës për ndalim, ai ka goditur dy zyrtarë policorë, të cilët kanë pësuar lëndime dhe janë detyruar të marrin trajtim mjekësor.
Pas ndjekjes nga njësitë policore, automjeti është arritur të ndalet nga njësia e trafikut në Vushtrri. Në veturë ndodheshin tre persona, të cilët janë shoqëruar në Stacionin Policor në Vushtrri për procedura të mëtejshme.
Shoferi i veturës, Shkëlzen S., po ashtu ka marrë trajtim mjekësor, ndërsa me vendim të Prokurorit kujdestar është ndaluar për 48 orë nën dyshimin për veprën penale “Sulm ndaj personit zyrtar”.
Dy personat e tjerë që ndodheshin në veturë janë intervistuar në cilësinë e dëshmitarëve.
Rasti është duke u trajtuar nga njësia e hetimeve rajonale, ndërsa hetimet lidhur me kontrabandën e dyshuar dhe rrethanat e incidentit janë në zhvillim./Sinjali/
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
