Prokuroria Speciale e Kosovës ka kërkuar urdhër-arrest për Goran Rakiqin, ish-kryetarin e Listës Serbe, lidhur me hetimet për barrikadat e vendosura në pjesën veriore të Kosovës në vitin 2022.
Kërkesa i është drejtuar Gjykatës Themelore në Prishtinë pasi Rakiqi nuk është paraqitur pas tri ftesave të dërguara nga Prokuroria.
Zëdhënësja e Prokurorisë Speciale, Arbnora Luta, ka konfirmuar se Rakiqi është ftuar tri herë.
Ai ka munguar fillimisht për shkak të problemeve shëndetësore, ndërsa për dy ftesat e tjera nuk ka dhënë arsyetim. Sipas Prokurorisë, kërkesa për urdhër-arrest është bërë “me qëllim të sigurimit të prezencës së tij në procedurë”.
Ky rast lidhet me barrikadat në veri të vendit gjatë vitit 2022, kur Rakiqi ishte deputet i Kuvendit të Kosovës.
Në të kaluarën, kryeministri Albin Kurti e kishte mbështetur Rakiqin, duke mohuar mundësinë që ai të ishte përfshirë në organizimin e protestave apo në eskalimin e tensioneve.
Kurti kishte deklaruar para gazetarëve se Rakiqi ishte përpjekur që situata të mos eskalonte dhe nuk kishte vepruar në mënyrë të dhunshme.
“Me ministrin Rakiq kemi pasur dallime herë më të vogla, herë më të mëdha, por komunikimi dhe bashkëpunimi ka qenë gjithmonë i rregullt. Sipas informacioneve që kam marrë nga ai, besoj se është përpjekur që situata të mos eskalojë dhe të mos ketë veprime të dhunshme. Nuk mendoj se duhet të ndërmerren masa ndaj tij,” kishte deklaruar Kurti.
Gazeta Insajderi ka kërkuar përgjigje nga Gjykata Themelore në Prishtinë për të parë, nëse do miratohet kërkesa e prokurorisë.
