Dyshohet se mbrëmë rreth orës 02:30 të mëngjesit është rrahur brutalisht ish-kryetari i Listës Serbe, Goran Rakiq.
Burimet e Dukagjinit bëjnë të ditur se Rakiq është sulmuar nga një grup personash në krye me Goran Vuçeviq, tani i dyshuar kryesor për këtë sulm.
Në bazë të informacioneve të Dukagjinit, Goran Vuçeviq është vëllau i Vladimir Vuçeviq i cili është pjesëmarrës në sulmin terrorist në Banjskë të Zveçanit kundër policisë së Kosovës, ku mbeti i vdekur Afrim Bunjaku tani hero i Kosovës.
Burimet thënë se Rakiq është rrahur keq në kafiterin e Goran Vuçeviqit.
Pas ngjarjes, Policia e Kosovës ka shkuar në banesën e Rakiqit, ku është gjetur i rrahur keq por që ai ka thënë se ”është rrëzuar’’.
Gjithashtu burimet tregojnë se Rakiq ka kërkuar ndihmë mjekësore në spital, ku edhe është regjistruar, por dyshohet se ka pasur përpjekje për të fshirë rastin nga regjistri mjekësor.
Lidhur me këtë rast, Goran Vuçeviq së bashku me pjesëmarrësit e tjerë është i dyshuar për rrahjen e Rakiqit.
Lidhur me këtë ngjarje ka reaguar edhe eksperti i sigurisë, Agim Musliu në rrjetin social X.
Ai ka thënë se Rakiq është rrahur nga miqtë e tij dhe se po trajtohej në fshehtësi. Për këtë ngjarje Musliu ka shtuar tutje se do të bëhen përpjekje që sulmi të paraqitet si sulm i shqiptarëve ndaj Rakiqit.
”Ish-kryetari i Listës #Srpska, Goran Rakiq është rrahur mbrëmë në Mitrovicë, në pjesën veriore me shumicë serbe. Ndonëse ishte rrahur nga miqtë e tij, kriminelët dhe terroristët e Vuçiqit dhe Radoiçiqit, ai trajtohej në fshehtësi. Me siguri ky rast do të paraqitej si sulm i shqiptarëve duke përhapur dezinformata kudo”, ka shkruar Musliu.
