Situata në portin kryesor të qytetit Patras, që lidh Greqinë me Italinë, është përmirësuar këtë mëngjes pas një nate të rëndë me përballje me flakët.
Zëdhënësi i shërbimit zjarrfikës, Vassilis Vathrakogiannis, tha se edhe pse zjarri nuk është shuar plotësisht, “xhepa të shpërndarë” janë duke u trajtuar në pjesët lindore të qytetit, ndërsa më e keqja duket se ka kaluar.
Sipas autoriteteve greke dhe të dhënave nga Copernicus dhe Observatori Kombëtar në Athinë, flakët kanë djegur mbi 10 mijë hektarë tokë në disa zona të vendit, përfshirë Patrasin, ishullin Hios, Zakintosin dhe afër qytetit Preveza.
Policia ka arrestuar një 25-vjeçar të dyshuar për ndezjen e njërit prej katër zjarreve që shpërthyen pranë Patrasit ditën e martë.
Për shkak të afrimit të flakëve me zonat urbane, të mërkurën autoritetet evakuuan një spital për fëmijë dhe një shtëpi për të moshuar. Pamje dramatike gjatë natës treguan flakë që rrethuan qytetin, ndërsa një parking doganor me mbi 500 automjete u shkatërrua plotësisht nga zjarri.
Ndërkohë, profesor Alexandros Dimitrakopoulos nga Universiteti Aristoteli i Selanikut, paralajmëron për rrezikun e zjarreve në zonat urbane:
“E kemi parë këtë në Athinë që nga viti 2021, dhe tani edhe në Patras”, tha ai.
Zjarre të fuqishme vazhdojnë të digjen edhe në ishujt Zakintos dhe Hios, si dhe në rrethinën e Prevezës. Në terren janë angazhuar rreth 600 zjarrfikës dhe afro 30 aeroplanë e helikopterë, ndërsa ulja e erës këtë mëngjes ka ndihmuar në kontrollin e situatës.
Greqia po përjeton një verë të vështirë me zjarre masive të nxitura nga temperaturat ekstreme, që sipas shkencëtarëve, janë të lidhura drejtpërdrejt me ndryshimet klimatike të shkaktuara nga njeriu.
