Pas dështimit edhe të mandatarit të dytë, Glauk Konjufca, për të formuar Qeverinë, vendi po shkon drejt zgjedhjeve të reja.
Presidentja, Vjosa Osmani, ka thirrur sot në një takim krerët e subjekteve politike për të diskutuar për datën e zgjedhjeve.
Nga njohësit e fushës, fundi i dhjetorit, po shihet si koha kur qytetarët mund t’iu drejtohen sërish kutive të votimit.
Në lidhje me këtë çështje ka folur për “Gazeta Blic” politikani dhe zyrtari i lartë i PDK-së, Xhavit Haliti.
Haliti tha se data e zgjedhjeve caktohet nga Presidentja pas konsultimit me subjektet politike por se do të duhej që partitë të kenë kohë të bëjnë përgatitjet e duhura.
Ai potencoi se njëra nga dy të dielat e fundit të dhjetorit mund të jetë opsion.
“Tani data e zgjedhjeve mund të caktohet nga Presidentja, pas konsultimit me partitë politike. Do të duhej që Partitë të kenë kohë që të bëjnë përgatitjet e duhura.Besoj që njëra nga dy të dielat e fundit të dhjetorit do të duhej të mbahen” tha Haliti.
Haliti foli edhe për rezultatin që pritet të ketë PDK-ja në zgjedhjet e ardhshme pasi ndryshimeve që ndodhën në këtë parti.
Ai tha se gjithçka varet nga mobilizimi i strukturave të partisë dhe eleminimi i pakënaqësive eventuale.
“Sa i përket rezultatit të PDK-së, kjo varet nga shumë faktorë, por varet shumë edhe nga mobilizimi i strukturave të partisë, eleminimi i pakënaqësive eventuale, fushata që bëhet, dhe shumë faktorë të tjerë që ndikojnë për mobilizimin e partisë, besueshmërisë nga elektorati dhe shkathtësisë politike të atyre që janë në ballë të fushatës. Mbetet të shohim a do kemi koalicione apo secila parti do hyj e vetme në fushatë” tha Haliti për “Gazeta Blic”.
