Anëtari i Kryesisë së LDK-së, Muhamet Hamiti, ka fajësuar pushtetin aktuale për ringjallje të sentimentit anit-evropian në Kosovë.
Ai ka përmendur përpjekjet e kosovarëve për të fituar mbështetjen perëndimore.
Në profilin e tij në “Facebook”, Hamit ka shkruar se Kosova ka qenë e bekuar me këtë mbështetje.
“Kosova ia doli ta sigurojë përkrahjen e vendeve kryesore perëndimore, të SHBA-ve, të Britanisë së Madhe, të Francës, të Gjermanisë etj, për kauzën e vet të lirisë, të pavarësisë dhe të demokracisë, për çlirim nga okupimi serb. Më tej përkrahje për shtetin e pavarur dhe sovran të Kosovës që u shpall më 2008 dhe u njoh për shpejt nga më shumë se 100 vende anëtare të OKB-së. Mbas pothuaj një dekade të lëvizjes për pavarësi që e drejtoi Presidenti Ibrahim Rugova, edhe të luftës çlirimtare të atyre viteve, më 24 mars 1999, aleanca më e madhe politike-ushtarake në historinë e njerëzimit, NATO-ja, ndërhyri për ta shpëtuar popullin e Kosovës nga lufta gjenocide e Serbisë së Millosheviqit. Kosova u çlirua më 12 qershor 1999”, ka shkruar Hamiti, duke dhënë detaje tjera.
“Në këto 26 vjet të lirisë sonë, 17 vjet të pavarësisë së Kosovës, SHBA-të dhe vendet evropiane i kemi pasur në krah në përpjekjen tonë për rindërtim të shoqërisë dhe ndërtim të shtetit tonë demokratik, për zhvillim të gjithëmbarshëm shoqëror dhe ekonomik, për anëtarësim në institucione dhe organizata ndërkombëtare si shtet i pavarur. Sot, mbas kaq kohe, për fajin e kastës aktuale pushtetore, janë ringjallur sentimente anti-evropiane në shoqërinë tonë që ta kujtojnë atë diskursin e parademokracisë sonë kur Evropës i visheshin atribute nga më të poshtrat që s’dua t’i përmend këtu për hir të higjienës së ekosistemit tonë diskursiv”, ka shkruar ai.
Më tej, ai ka përmendur edhe sanksionet e BE-së.
“Kosova është në vitin e tretë të sanksioneve ekonomike të BE-së, që po i vuajnë qytetarët tanë, por jo drejtuesit aktualë politikë të vendit tonë, për fajin e të cilëve janë vendosur këto sanksione më 28 qershor të vitit 2023.
Për paralizën shoqërore dhe politike, për stagnimin ekonomik të Kosovës, fajin e ka Qeveria e Vetëvendosjes e Albin Kurtit, që tash po sundon në kundërshtim me Kushtetutën e Republikës së Kosovës”, ka shkruar ai.
