“Për fat të keq raportet nuk janë vetëm në fazë kritike, por edhe në fazë të rrezikshme. Rreziku vjen pasi pasojat mund të jenë shumë të rënda për Kosovën. Ne na kanë bërë me dije në vazhdimësi administrata e Biden, siç e dini edhe ambasadori amerikan në Kosovë, Jeffrey Hovenier, e ka përdorur edhe atë thënien e tij mos urinoni në klubin ku doni të hyni, për etikën e tij, ai ka qenë një njeri me integritet edhe një diplomat paraekselanc, një njeri që e ka dashtë Kosovë me zemër”, ka thënë Haradinaj, gjatë një debati televiziv.
Kandidati për kryeministër i koalicionit për Kosovën Fituese ka shtuar se: “Një njeri që nga koha e Clinton që në vazhdimësi ka qenë me Kosovën, edhe në negociatat në Rambuje dhe në çdo etapë tonën, edhe ajo ka qenë një shprehje e dhimbjes së tij për pasojat për Kosovën. Pra, për katër vite Administrata Biden na ka sqaru se do të kishim bërë punë më të mira për Kosovën nëse do të kishim bashkëpunim më të mirë, në raste të tjera edhe deri tek mungesa e rezultateve”.
Haradinaj ka përkujtuar: “E dini që për këto vite kam qenë në ShBA rregullisht, në vazhdimësi e kam marrë vlerësimin se janë të shqetësuara me veprimet e pakoordinuara të Kurtit dhe Qeverisë. Dhe se ata nuk po arrijnë të japin ndihma për shkak të kësaj, sjelljeve të tij. Më thanë ne kemi vështirësi të ju mbrojmë para armiqve tuaj, ne e kemi ta pamundur edhe me i bind skeptikët për ju pasi kryeministri i juaj po na pamundëson që ne t’iu ndihmojmë. Kuptohet se kjo në dy vitet e fundit është përkeqësuar”.
