Kryetari i Aleancës për Ardhmërinë e Kosovës, Ramush Haradinaj, ka bërë të ditur se në katër vitet e fundit, 211 mijë e 789 persona kanë braktisur Kosovës.
Haradinaj përmes një postimi në Facebook, është shprehur se shumë shpejt doli në pah mashtrimi i madh i pushtetit, dhe sipas tij kjo i shtyu njerëzit që zgjedhjen e problemeve ekonomike ta kërkojnë në rrugët e botës.
“211.789 persona e kanë braktisur Kosovën veç këto katër vitet e fundit. Mashtrimi i ndryshimit të madh të pushtetit shumë shpejt doli në pah dhe kjo i shtyri njerëzit që në masë të madhe dhe heshturazi zgjidhjen e problemeve ekonomike ta kërkojnë në rrugët e botës.” – ka shkruar Haradinaj.
Duke u shprehur se është e drejtë njerëzore e drejta për një jetë më të mirë, Haradinaj ka thënë se Kosova nuk ka problem migrimi por ka problem dyndjeje të popullatës.
“Të mos keqkuptohemi, gjithmonë ka pasur dhe do të ketë migrim nga vendet e Ballkanit, pra edhe nga Kosova për në vendet perëndimore. Është e drejtë njerëzore e drejta për një jetë më të mirë. Megjithatë, ajo çka po ndodhë në Kosovë në këto katër vite nuk është më vetëm migrim, por ky fenomen po merr karakter të dyndjes. Kosova nuk ka problem migrimi por ka problem dyndjeje të popullatës.” – kashkruar ai.
Në fund Haradinaj ka thënë se qe katër vjet Kosova ka regres ekonomik e assesi progres, dhe sipas tij Qeveria vazhdon sjelljen e papërgjegjshme.
“Qe katër vjet Kosova ka regres ekonomik e assesi progres. Pagat e njëjta, çmimet e larta, perspektiva zero. Qeveria vazhdon sjelljen e papërgjegjshme. Nuk e pranon problemin por e vazhdon mashtrimin se më shumë po kthehen se sa që po shkojnë e të gjithë e dimë se askush nuk po kthehet. Kjo qasje urgjent duhet të ndryshojë!” – ka përfunduar ai.