Enver Hasani mendon se deklarimi i Presidentes Osmani ndikoi në vlerësimin e Gjykatës Kushtetuese, sidomos në mos-vendosjen e masave, ndaj Avni Deharit dhe deputetëve që nuk marrin pjesë në votim…
Për Enver Hasanin, ish- krytear i Gjykatës Kushtetuese, është e habitshme se si Gjykata vlerësoi se Avni Dehari e ka shkelur Kushtetutën, por njëherit, urdhëron të njëjtin që ta vazhdojë seancën e 8 prillit, aty ku e ka lënë.
Referuar leximit të dispozitave të vlerësimit të Gjykatës Kushtetuese (meqë Akgjytkimi final i plotë nuk është publikuar ende), Hasani thotë se në këtë pikë, ‘është vështirë e pajtueshme me standardet demokratike”.
“Në aspektin profesional mendoj se është e çuditshme se si mund të konstatohet shkelja kushtetuese e zotit Avni Dehari dhe i njëjti të urdhërohet të vazhdojë aty ku e ka shkelur Kushtetutën. Kjo nuk mund të arsyetohet me standardet e gjyqësisë kushtetuese. Dhe e dyta, ju e dini, edhe në aktgjykimin e vitit 2014, edhe në atë të para një muaji të Gjykatës Kushtetuese është thënë se deputetët duhet të rrinë dhe të votojnë, por tani i urdhëron. Edhe kjo bie ndesh me postulatin e mandatit të lirë dhe besoj se kjo është vështirë e pajtueshme me standardet kushtetuese” – i tha z.Hasani, Radios Evropa e Lirë.
Në pyetjen e REL-it, se kush duhet ta caktojë seancën e radhës dhe kur mund të thirret ajo, Hasani thotë se seanca duhet të vazhdohet nga skenari i 8 prillit, 30 ditë nga fillimi i asaj séance.
“Diapozitivi thotë se duhet të thirret sipas datës kur zoti Dehari e ka bërë propozimin për votim të fshehur, atë që e bëri në mënyrë arbitrare, mënyrën e ndryshimit të rendit të ditës, gjykata ka urdhëruar ekzekutimin e rendit të ditës të datës 8 prill. Duhet të ekzistojë një pikë se kur ka nisur gjendja jokushtetuese. Gjendja jokushtetuese ka nisur në momentin kur zoti Dehari e ka ndryshuar rendin e ditës. Zoti Dehari duhet të vazhdojë seancën ashtu siç ka qenë caktuar më 8 prill, kur është caktuar skenari i konstituimit të Kuvendit. Pra, duhet të numërohen 30 ditë nga fillimi”, thotë Hasani.
Hasani vë në pah edhe në këtë aktgjykim, se mungojnë ‘masat’ në rast të mospërmbushjes së pikave, dhe për këtë, thotë se mund të jetë faktor ‘intimidimi i drejtësisë nga Presidentja Vjosa Osmani’.
“Mund të spekuloj, mungesë guximi. Arsyeja pse aktgjykimi nuk i ka shkuar deri në fund është deklarimi i zonjës presidente [të Kosovës, Vjosa] Osmani. Shihet qartë se mund të ketë ndikuar në dispozitiv, në aspektin e moscaktimit të masave, kjo është ndërhyrje e saj në drejtësi dhe në një mënyrë ose tjetër e ka intimiduar gjykatën dhe gjykata nuk ka shkuar deri në fund të këtij aktgjykimi, sepse po shihet qartë që një gjyqtar është kundër” – thotë Hasani dhe e përsëritë këtë edhe në një rast tjetër gjatë intervistës:
“Mungesa e masave ndëshkuese sa i përket afatit pas 30 ditëve dhe zotit Dehari është pasojë e ndikimit nga ana e presidentes Osmani”, thotë ai.
I pyetur se çka ndodh në rast se Kuvendi nuk konstituohet edhe pas 30 ditësh, thotë se ‘nëse lidhemi për fjalësh’ – qysh thotë populli – atëherë z.Kurti ka deklaruar se do ta zbatojë çdo vendim të Gjykatës, andaj sipas Hasanit “dispozitivi është shumë i qartë dhe unë nuk kam asnjë arsye që ai nuk do ta bëjë një gjë të tillë”.
