Ish-deputeti i Partisë Demokratike të Kosovës, Bekim Haxhiu i cili për vite ka qenë përfaqësues në komisione parlamentare për shëndetësi, ka kritikuar ashpër qeverinë Kurti për, siç e cilëson ai, degradimin e vazhdueshëm të sistemit shëndetësor në vend.
Në një reagim të publikuar në Facebook, Haxhiu ka thënë se pavarësisht premtimeve të mëdha për “transformim”, “reformim” dhe “qeverisje ndryshe”, sektori i shëndetësisë është zhytur në probleme të thella, me lista të gjata pritjesh, keqmenaxhim kronik, korrupsion sistematik dhe mungesë totale të vizionit.
“Qeveria Kurti, 5 vite dështim në shëndetësi! Pavarësisht premtimeve bombastike, realiteti është shqetësues. Lista të gjata pritjesh, mungesë barnash, keqmenaxhim dhe paaftësi. Reforma ka mbetur vetëm fjalë në letër”, ka shkruar ai.
Ai solli në vëmendje një rast konkret, duke theksuar se Qendra Klinike Universitare e Kosovës (QKUK) ka mbetur pa sigurim fizik, duke vënë në rrezik përditshëm mjekët, infermierët dhe pacientët.
“Nëse s’mund të menaxhojnë as rojet, si do të reformojnë sistemin shëndetësor? Kur institucioni më i madh shëndetësor i vendit nuk ka as mbrojtje bazike, çfarë mund të thuhet për pjesën tjetër të sistemit?”, shkroi Haxhiu.
Ai përfundoi se, pesë vite pas ardhjes në pushtet të Qeverisë Kurti, qytetarët nuk kanë parë as reformë, as transformim, por vetëm “dështim dhe zhgënjim të thellë”.
