Nënkryetarja e VV-së, Albulena Haxhiu në konferencën për media pas dështimit të mbledhjes së Kryesisë së Kuvendit ka thënë se po të ishte aty Lista Serbe, s’do të mungonin as PDK e LDK.
“Dolëm nga takimi për faktin se s’kishte kuorum. Në këtë takim s’ishin dy nënkryetarët, Vlora Çitaku dhe Kujtim Shala. Ata nuk ishin të pranishëm, dhe unë jam e bindur që po të ishte Lista Serbe, ata do të ishin këtu, por që pa Listën Serbe ata nuk ishin të pranishëm”, tha Haxhiu.
Ajo tha se situata aktuale nuk është më idealja, por do të ishte e tillë nëse Nenad Rashiq do të kishte marrë votat e mjaftueshme për nënkryetar.
“Situata në të cilën jemi nuk është ideale. Ideale do të ishte nëse Kuvendi do të arrinte që ta zgjidhte nënkryetarin Nenad Rashiq dhe po të merrte pjesë opozita, mendoj që Rashiq do të ishte zgjedhur si anëtarë i Kryesisë së Kuvendit, por kjo nuk ndodhi fatkeqësisht. Ne nuk i gjetëm as pesë deputetë a sa na nevojiteshin, pasi votat që i ka pasur kanë qenë 56 për ta bërë anëtarë të kryesisë së Kuvendit”.
Haxhiu deklaroi se puna e Kuvendit s’ka pse ndalet, dhe se ky institucion s’mund të mbetet peng i Listës Serbe apo kalkulimeve të subjekteve tjera politike.
“Në këto rrethane ne duhet të vazhdojmë Kuvendi ka kapacitetin për të vazhduar mandatin e vet, siç e tha edhe Basha që nënkryetarët janë zgjedhur dhe e kemi shumicën. Nevojitën katër anëtarë që mbledhja të fillojë e të vazhdojë. Ne s’duhet ta ndalim punën e Kuvendit, nuk mundet që ky kuvend të mbetet peng i Listës Serbe, apo kalkulimeve të ndonjë subjekti”, tha Haxhiu.
