Ish-ministri i Punëve të Jashtme, Enver Hoxhaj, ka theksuar se Lindja e Mesme po përjeton një periudhë të rëndësishme dhe vendimtare, që mund të ndikojë ndjeshëm në politikën globale.
Në një postim të tij në Facebook, Hoxhaj vlerësoi se rënia e regjimit të Bashar al-Assadit hap mundësi të reja për Kosovën, veçanërisht në përpjekjet për të tejkaluar kundërshtimin e Iranit ndaj pavarësisë së saj.
Ai sugjeroi që Kosova duhet të jetë një nga shtetet e para që e njeh qeverinë e përkohshme të Sirisë, duke shfrytëzuar këtë moment për të përshpejtuar njohjen e Kosovës edhe nga Libani dhe Iraku, dy shtete ku Serbia ka mbështetur regjimin e Assadit.
Postimi i plotë:
Në vitin 2011, sapo isha bërë Ministër i Jashtëm, ndodhi Pranvera Arabe, një ndryshim tektonik në botën arabe. Atë mundësi, në një rajon të ngurtë ndaj pavarësisë së Kosovës, e përdorëm për të marrë njohjen e Kosovës nga Kuvajti, Egjipti, Libia, Jemeni dhe për të hapur komunikimet me Tunizinë dhe Marokun, që mbështetën anëtarësimin e Kosovës në organizata ndërkombëtare. Me shtetet arabe sunite, Kosova krijoi një raport të ri. Kundër Kosovës ishin Irani dhe vendet nën ndikimin e Teheranit.
Sot, Lindja e Mesme po kalon një nga momentet më të rëndësishme në dekada. Me rënien e regjimit të Bashar al-Assadit, Kosovës i hapet një mundësi e re për të tejkaluar kundërshtimin e Iranit ndaj pavarësisë së saj, në vende si Siria, Libani dhe Iraku, të cilat po dalin nga orbita e ndikimit iranian, falë politikës së mençur të Turqisë dhe Izraelit.
Sot, qeveria e Kosovës nuk ka ende qëndrim për këto zhvillime dhe se si t’i përdorë ato për njohjen e mëtejshme të Kosovës. Kosova duhet të jetë ndër vendet e para që njohin qeverinë e përkohshme të Sirisë, një vend ku Serbia ishte aleate e regjimit brutal të Assadit, dhe të kthejë këtë moment në favor të njohjes së Kosovës nga Libani dhe Iraku. Diplomacia e Kosovës duhet të dalë nga moratoriumi i vetë-imponuar ndaj njohjes ndërkombëtare të shtetësisë së Kosovës.
