Një burrë dhe një grua kanë vdekur pasi mbetën të bllokuar në një dhomë private saunash që u përfshi nga zjarri në Japoni të hënën, ka raportuar BBC.
Policia e Tokios po heton nëse një dorezë dere e dëmtuar e kishte bllokuar çiftin brenda dhomës në Sauna Tiger, në lagjen Akasaka të qytetit, raportojnë mediat lokale.
Hetuesit zbuluan gjithashtu se sistemi i alarmit të emergjencës së objektit ishte i fikur, dhe dyshohet se kishte qenë i tillë për dy vjet.
“Ne shprehim ngushëllimet tona më të thella… dhe simpatitë tona të përzemërta për pikëllimin dhe dhimbjen e thellë që nuk mund të shprehet me fjalë”, tha Sauna Tiger në një deklaratë në faqen e saj të internetit.
Viktimat janë emëruar nga mediat lokale si Yoko Matsuda, një artiste thonjsh 37-vjeçare, dhe bashkëshorti i saj Masanari, 36 vjeç, i cili drejtonte një sallon bukurie.
Shërbimi i zjarrfikësve u thirr rreth orës 12:25 sipas orës lokale (03:25 GMT) të hënën, kur u aktivizua alarmi i zjarrit i objektit. Kur mbërritën zjarrfikësit, doreza e derës së saunës ishte në dysheme, thanë hetuesit për mediat japoneze.
Mediat lokale raportuan se çifti u gjet i rrëzuar në dysheme, njëri mbi tjetrin, me kokat pranë derës. Ata u dërguan me urgjencë në spital, por më vonë vdiqën.
Një peshqir i djegur thuhet se u gjet brenda saunës, duke treguar se zjarri mund të jetë shkaktuar nga prekja e gurëve të nxehtë të saunës nga peshqiri, tha policia.
Dhoma e saunës kishte një alarm emergjence në mur për të njoftuar stafin nëse nevojitej ndihmë, por hetuesit zbuluan se ishte fikur. Megjithatë, mbulesa e alarmit ishte hequr, duke treguar se çifti me shumë mundësi e kishte shtypur atë për të kërkuar ndihmë, tha Departamenti i Policisë Metropolitane./GazetaExpress
