Jovan Viçentijeviç, i dyshuar për spiunazh dhe terrorizëm në rastin “Ibër-Lepenc”, sipas aktakuzës, ka shfaqur bindje të çuditshme për financimin ndërkombëtar. Ai besonte se një pjesë e fondeve të rrjetit kriminal të Milan Radoiçiqit, që sipas tij, arrinin në 30 milionë euro, ishin destinuar për të mbështetur fushatën e Donald Trump për President të Shteteve të Bashkuara.
Aktakuza tregon se Viçentijeviç e përmend këtë pretendim gjatë hetimeve si një nga informacionet që e lidhin atë me strukturat më të gjerë kriminale dhe paramilitare. Ai e shihte Radoiçiqin jo vetëm si lider lokal, por edhe si një mbështetës të projekteve ndërkombëtare, duke përfshirë operacione të dyshimta financiare jashtë Kosovës.
Sipas aktakuzës që ka siguruar Gazeta Insajderi, hetuesia ka konsideruar këtë besim si një kombinim i dezinformimit dhe mitologjisë personale të Viçentijeviçit, që shpesh përpiqej të justifikonte veprimet e tij dhe lidhjet me strukturat serbe. Megjithatë, pretendimi për 30 milionë euro për fushatën e Trump ka tërhequr vëmendjen për mënyrën se si ai perceptonte ndikimet ndërkombëtare dhe rolin e tij në një rrjet më të gjerë spiunazhi dhe kriminaliteti.
“Tutje, i pandehuri Jovan Viqentijeviq ka theksuar se në muajin tetor të vitit 2024 ka qenë i planifikuar një sulm në Republikën e Kosovës (nuk ka cekur diçka më shumë), por ishte stopuar nga i kërkuari me letër rreshtimi ndërkombëtar Milan Radoiçiq me arsyetimin se duhet të presim deri të përfundojnë zgjedhjet në Amerikë, dhe kandidati për president të SHBA-së, z. Donald Trump të fitojë, pasi që, sipas informatave që ka i pandehuri Viqentijeviq, Milan Radoiçiq ka financuar fushatën e z. Trump te Lobi Serb me tridhjetë (30) milionë dollarë”, thuhet në aktakuzën e Prokurorisë Speciale.
Viçentijeviç përballet me akuza të rënda për spiunazh dhe terrorizëm në veri të Kosovës Ai, bashkë me vëllanë akuzohen për sulmin me rreth 20 kilogramë eksploziv në kanalin e Ibër–Lepencit një vit më parë.
