Ndërtimet ilegale kanë qenë njëra prej karakteristikave negative në Kosovën e pasluftës, po që duket se ky trend ka tendencë të vazhdoj edhe tash, nga kompani ndërtuese e individ që synojnë përfitime për vete ose të tjerët.
Një rast i tillë së fundmi ka ndodhur edhe në Mitrovicë, ku drejtoria e Inspeksionit i ka ndërprerë punimet kompanisë ndërtuese OKI Sh.P.K. në një punishte në rrugën ‘Agim Ramadani’, për shkak të mos pajisjes me leje ndërtimore, raporton Veriu.info.
Pas informacioneve se kompania ndërtuese OKI Sh.P.K. ka nisur pa leje punimet në hapjen e themelit të një objekti banesor, Veriu.info ka dërguar pyetje në komunën e Mitrovicë, se a ka leje kompania në fjalë për punimet që i ka zhvilluar aty.
Zyra për Informim e Komunës së Mitrovicës, i ka përcjellur portalit Veriu.info përgjigjen e drejtorit të Inspeksionit, Valon Brahimi, ku thuhet: “Operatori ne fjalë nuk ka leje dhe nga inspektoret e ndertimit i janë nderprere punimet!”.
Njëri prej problemeve që janë ballafaquar shumë qytetarë të Kosovës për me shumë se dy dekada, është mos pasja e mundësisë së nxjerrjes së fletave poseduese për pronat e atyre, pasi që ato shpeshherë janë të ndërtuara ilegalisht dhe rrjedhimisht nuk kanë mundur të pranohen teknikisht.
Ndryshe, kjo nuk është hera e parë që kompania OKI Sh.P.K. nis ndërtimin e objekteve banesore pa leje, pasi që edhe në vitet e kaluara kishte bërë veprime të njëjta, ku komuna e Mitrovica kishte nxjerrë vendime për rrënimin e të paktën një objekti të kësaj kompanie, vendim i cili nuk ishte ekzekutuar më pas.
