Policia e Kosovës ka identifikuar të dyshuarin për hedhjen e eksplozivit pranë Liqenit të Ujmanit. Aktualisht, sipas burimeve të Dukagjinit, Policia e Kosovës është duke zhvilluar bastisje në shtëpinë e të dyshuarit.
Policia e Kosovës pas hetimeve intensive ka arritur të identifikojë personin e dyshuar për hedhjen e eksplozivit ndaj veturave të qytetarëve shqiptarë në Liqenin e Ujmanit
Sipas burimeve të Dukagjinit brenda institucioneve të sigurisë, Policia aktualisht është duke bastisur shtëpinë e të dyshuarit në veri të vendit.
Si pasojë e këtij sulmi me eksploziv u dëmtuan të paktën dy vetura, njëra me targa vendore e tjetra me targa amerikane.
Pronarët e veturave për Dukagjinin thanë se ishin duke u larë në liqe kur kanë dëgjuar krismën e kanë parë tymin e zi.
Ata thanë se kanë ardhur edhe herëve të kaluara në Ujman por nuk kanë pasur asnjë problem, teksa treguan se Policia i ka larguar të gjithë pushuesit që ishin aty.
Kryeministri i Kosovës, Albin Kurti, ka reaguar pas shpërthimit duke thënë se në këtë sulm kriminal do të përfshihen edhe institucionet e sigurisë.
Në një postim në Facebook, Kurti ka theksuar se Serbia dhe qarqet e caktuara mike me të, nuk iu leverdis normaliteti i krijuar në veri të vendit.
Ai ka thënë se humbja e ndikimit në këtë zonë ka shkaktuar nervozizëm dhe agresivitet nga ana e Serbisë dhe grupeve kriminale, të cilat kanë humbur mundësitë për përfitime të mëdha që kishin pas çlirimit të Kosovës.
