Britania e Madhe ka rënë dakord të ofrojë mbështetje ushtarake për Belgjikën pas inkursioneve me dronë në hapësirën e saj ajrore, deklaroi sot shefi i shtabit të mbrojtjes së Britanisë.
Richard Knighton tha se homologu i tij në Belgjikë pyeti këtë javë nëse Mbretëria e Bashkuar do të ishte e përgatitur të ofronte mbështetje mes inkursioneve me dronë në disa vende evropiane, përfshirë Belgjikën.
“Sekretari i Mbrojtjes (John Healey) dhe unë ramë dakord në fund të javës së kaluar që të vendosim njerëzit tanë dhe pajisjet tona në Belgjikë për t’i ndihmuar ata,” tha Knighton për BBC.
Aeroporti i Brukselit u mbyll përkohësisht të enjten në mbrëmje pasi u panë dronë pranë. Incidenti i fundit vjen pas inkursioneve me dronë të martën dhe të enjten pranë aeroportit në qytetin e Liezhit, plus dronë të parë pranë një baze ushtarake belge.
“Megjithatë, është e rëndësishme të jemi të qartë se ne nuk e dimë – dhe belgët ende nuk e dinë – burimin e këtyre dronëve, por ne do t’i ndihmojmë ata duke ofruar pajisjet dhe aftësitë tona, të cilat tashmë kanë filluar të vendosen për të ndihmuar Belgjikën”, tha Knighton.
Duke theksuar se aleatët e NATO-s do të punojnë për të mbështetur njëri-tjetrin, ai tha se kjo është arsyeja pse ata janë “shumë të lumtur që shohin personelin ushtarak të Mbretërisë së Bashkuar të vendosur për të mbështetur Belgjikën”.
Muajt e fundit kanë parë një seri inkursionesh me dronë në disa vende evropiane, ndonjëherë pranë aeroporteve ose objekteve ushtarake, duke përfshirë edhe mbi një bazë ushtarake belge këtë javë, raporton KosovaPress.
Disa zyrtarë evropianë ia kanë fajësuar incidentet Rusisë, duke i lidhur ato me një luftë hibride dhe konfliktin e vazhdueshëm në Ukrainë. Moska, megjithatë, ka mohuar me vendosmëri çdo përfshirje.
