Inspektorati Qendror i Punës ka shqiptuar tri gjoba të ndryshme ndaj kompanisë “Diambe Kosova Sh.P.K.” (i njohur si rrjeti i marketeve KAM), pas inspektimeve që zbuluan një varg shkeljesh ligjore, që nga mospagesat e plota të pagave e deri te mungesa e kontratave të punës dhe fshehja e të dhënave për orët shtesë.
Një seri inspektimesh të realizuara gjatë muajve të verës dhe vjeshtës së vitit 2025, kanë rezultuar me masa ndëshkimore për kompaninë e shitjes me pakicë në Kosovë. Sipas vendimeve që posedon Insajderi, vlera totale e gjobave të shqiptuara nga tri procese të ndryshme vlerësimi arrin në 2 mijë e 500 euro.
Vendimi më i rëndë vjen pas disa ankesave anonime ku punëtorët denoncuan se po paguheshin nën vlerën e kontratës dhe se kompania po u ndalte para nga paga për “vjedhjet apo humbjet në markete”.
Në vendim thuhet se kishte mungesa të kontratave. Për 6 nga 10 punëtorët e inspektuar, kompania nuk prezantoi fare kontrata pune, duke shkelur Nenin 10 të Ligjit të Punës.
Po ashtu, inspektorët kanë konstatuar se kishte edhe manipulime me paga. Punëtorët u paguan me shuma më të ulëta se ato që figurojnë në kontratat e tyre.
Inspektorati ia ka tërhequr vërejtjen kompanisë se nuk mund të zbriten paratë nga rroga e punëtorëve për humbjet në market pa u zhvilluar një procedurë e mirëfilltë disiplinore.
Për këto shkelje, kompania u gjobit me 1,700 euro.
Orët shtesë dhe “fshehja” e evidencës
Në një tjetër inspektim, “Diambe Kosova” u ndëshkua me 600 euro gjobë për shkak se kompania nuk kishte mbajtur të dhëna të sakta për punën jashtë orarit, punën gjatë fundjavave dhe festave zyrtare, duke tentuar të fshehë angazhimin real të punonjësve.
Ndërprerja e paligjshme e kontratave
Gjoba e tretë prej 200 eurosh erdhi pas një ankesë për ndërprerje të njëanshme dhe të kundërligjshme të marrëdhënies së punës. Inspektorati vërtetoi se punëdhënësi kishte shkelur Nenin 15 të Ligjit të Punës, duke mos respektuar procedurat e parapara për largimin e punëtorit nga puna.
Ministria nuk e ka shqyrtuar ende ankesën e KAM-it, kompania zgjedh heshtjen
Megjithëse vendimet e Inspektoratit të Punës janë të prera, rrjeti i marketeve KAM ka bërë ankesë në shkallën në Ministrinë e Financave, Punës dhe Transfereve.
Gazeta Insajderi ka pyetru MFPT lidhur me këtë ankesë, por sipas pargjigjës së tyre ende nuk është shqytruat ankesa në fjalë.
“MFPT ju njofton se lidhur me pyetjet tuaja për trajtimin e ankesës së subjektit juridik ‘Diambe Kosova’, pas konsultimit me Komisionin dhe pas shqyrtimit të të gjitha lëndëve që kemi trajtuar deri tani, konstatojmë se kjo lëndë ende nuk ka arritur për trajtim në Organin e shkallës së dytë, i cili vepron si organ epror ndaj vendimeve të IP-së. Komisioni nuk ka asnjë të dhënë lidhur me këtë rast”, thuhet në përgjigjen e MFPT-së për Insajderin.
Në anën tjetër, Gazeta ka provuar të marrë një qëndrim edhe nga vetë drejtuesit e “Diambe Kosova”, për t’i pyetur rreth shkeljeve të konstatuara nga Inspektorati dhe pretendimeve të punëtorëve për ndalesa të jashtëligjshme në paga, por nuk kanë kthyer përgjigje.
