Në Mitrovicë ishte hapur klinika “Empatia 02”, e cila ofronte shërbime të psiokologjisë, psikiatrisë, logopedisë dhe shërbime tjera shëndetësore. Mirëpo, pak kohë pas hapjes në Mitrovicë, kjo klinikë është mbyllur nga Inspektorati Sanitar i Ministrisë së Shëndetësisë.
Përmes kërkesës për qasje në dokumente publike, Veriu.info ka siguruar vendimin e Inspektoratit Sanitar për refuzim të pëlqimit sanitar, përmes të cilit urdhërohet mbyllja e veprimtarisë afariste në objektin që ishte vendosur “Klinika Empatia 02 Mitrovicë” Sh.P.K.
Inspektorati Sanitar ka kontatuar se objekti dhe hapësirat në të cilat ushtrohet veprimtaria afariste nuk i plotëson kushtet për dhënien e pëlqimit sanitar, sepse: “Objekti në të cilin ushtrohet veprimtaria afariste është në katin përdhesë të ndërtesës për banim kolektivë, hapësirat e brendshme në shfrytëzim nga subjekti afarist nuk janë të përshtatshme për zhvillim biznesor”.
Inspektorati Sanitar kontaton se objekti ku ishte e vendosur klinika “Empatia” në rrugën “Nexhip Dragaj” në Mitrovicë nuk i plotëson kushtet sanitare në përputhje me projektin e miratuar dhe destinimin për të cilin ato janë ngritur. Nuk dihet nëse organet përgjegjëse komunale kanë bërë pranimin teknik të këtij objekti.
Veriu.info mëson se fjala është për një objekt banesor të ndërtuar nga “Ari Company” me pronar Bedri Halilaj, fakt që shihet edhe në fotografinë e mbylljes së saj, ku logo e kompanisë është e vendosur në derë.
Tutje në arsyetimin e vendimit të Inspektoratit Sanitar thuhet se korridoret e subjektit afarist janë të ngushta dhe kjo pengon frekuentimin normal të pacientëve/palëve dhe personit. Gjithashtu konstatohet se në atë objekt nuk ka ventilim natyral dhe artificial.
Inspektorati Sanitar ka gjetur edhe tjera parregullësi në objektin e “Ari Company” në të cilin ishte vendosur klinika “Empatia”, duke konstatuar se dyert e dhomave të punës për psikolog, logoped, ergoterapeuti, etj, nuk hapen dhe mbyllen në mënyrë të duhur.
Po ashtu në dhomat/hapësirat e këtij objekti ku ishte vendosur subjekti afarist nuk ka të instaluar lavaman, sikurse që janë hasur edhe 3 dhoma/hapësira pune që nuk kanë dritare, mungesa e të cilave pamundëson ventilimin natyral dhe artificial.
Veriu.info mëson se themelues dhe pronarë të klinikës “Empatia” janë Fitim Uka, ish deputet i Vetëvendosjes, Arian Musliu, asistent në Fakultetin e Edukimit në në Universitetin e Prishtinës dhe Rrezarta Zhinipotoku Behluli, e njohur në publike si eksperte e arsimit dhe punëtorë e GIZ-it.
