Ish kryeministri i Kosovës Isa Mustafa, në një prononcim për GazetaBlic, thotë se Kosovës i nevojitet një qeveri e cila do ta përafrojë atë me BE-në dhe do të ndërtojë ura bashkëpunimi me ShBA-të.
“Kosovës i nevojitet një qeveri e cila do ta përafrojë atë me BE-në dhe do të ndërtojë ura bashkëpunimi me SHBA-të”, tha ai.
Ai ka shprehur shqetësim për vështirësitë e formimit të një qeverie të qëndrueshme dhe për procesin që po zhvillohet, duke e cilësuar atë si jo të lehtë.
Mustafa tha se asnjë parti politike nuk ka një iniciativë konkrete që qon në formimin e qeverisë, ku thotë se më shumë iu pëlqen të mos marrin përgjegjësi në këto ndryshime të papara gjeopolitike.
“Nuk jam në situatë të parashikoj se kush do ta bëjë shumicën e nevojshme për ta zgjedhur qeverinë, por vërej se procesi është jo i lehtë. Është një situatë gati paradoksale, në të cilën asnjë subjekt nuk ka iniciativë konkrete që qon kah formimi i qeverisë, sepse çdo kombinim duket të jetë fragjil dhe se më shumë iu pëlqen të mos marrin përgjegjësi në këto ndryshime të papara gjeopolitike”, u shpreh Mustafa.
Ndër të tjera ai shton se shanset për të krijuar një qeveri stabile janë të njëjta me ato për shkuarjen në zgjedhje të reja.
“Ndoshta po tregohem pesimist, por mendoj se shansi për të formuar një qeveri stabile, të nevojshme për Kosovën, duket i barabartë me shansin për të shkuar në zgjedhje të reja”, përfundoi Mustafa për GazetaBlic.
