Prokuroria Speciale e Kosovës ka ngritur aktakuzë ndaj ministres në detyrë, Rozeta Hajdari, ish-zëvendëssekretarit Irfan Lipovica, drejtorit të Departamentit të Rezervave Shtetërore Hafiz Gara dhe afaristit Ridvan Muharremi, në rastin “Rezervat shtetërore”, ku dëmi ndaj buxhetit vlerësohet afër 3 milionë euro.
Kryeministri Albin Kurti është propozuar sërish si dëshmitar, edhe pse më herët nuk është përgjigjur në asnjë nga ftesat e gjykatës dhe është gjobitur dy herë për mosparaqitje.
Ish-kreu i Gjykatës së Apelit, Hasan Shala, ka folur në lidhje me mosparaqitjen e Kurtit në Gjykatë dhe tha se kjo është e rregulluar me Kodin e Procedurës Penale dhe se mosparaqitja mund të ndëshkohet, madje edhe të çojë në shoqërim me dhunë.
“Kjo është e rregulluar me ligj, me kodin e procedurës penale, mos shkuarja mund edhe të dënohet, por edhe të shkon me dhun, përdoret dhuna ndaj tij kur fillon shqyrtimi kryesorë, përderisa nuk fillon shqyrtimi kryesorë ai mbetet kështu”, tha ai.
Ai tha se kur fillon shqyrtimi kryesor, Kurti është i detyruar të jetë pjesë e gjykimit. Përveç dënimit që e parasheh ligji për mosparaqitje, ai më pas mund të shoqërohet me dhunë për t’u paraqitur në gjykatë
“Fillimisht mund të dënohet me të holla, pastaj jepet urdhër me u shoqëru në gjykatë me dhunë, të vijnë në gjykatë në ditën kur gjykohet”, tha Shala.
Mirëpo, Shala tha se nëse Kurti refuzon të japë dëshmi, ndaj tij mund të caktohet masa e paraburgimit deri në 30 ditë.
“Përveç dënimit që e parasheh ligji ai mundet si masë më shtrënguese edhe caktimi i paraburgimit deri në 30 ditë nëse e refuzon dëshminë, pas 30 dite duhet me u liru”, deklaroi ai.
Shala shtoi se kryeministri Albin Kurti po rrezikon vetveten me mosparaqitjen për të dëshmuar. Ai tha se Kurti mund të përfshihet edhe si i akuzuar, pasi konsiderohet “thelbësor” për kontratën e kundërligjshme që ka shkaktuar dëme ndaj buxhetit të Kosovës.
“Ai po e rrezikon vetveten, sepse edhe ai besoj që ka me marrë pjesë si i akuzuar aty, për shkak se edhe duhet me u dënu, për shkak se ky është alfa omega e asaj kontrate që është e kundërligjshme sepse është dëmtuar buxheti i Kosovës”, tha ai për Front Online.
